छक्का पन्जा ४ को ‘सिरूपाते जुँगामा’ सार्वजनिक

२३ फागुन, काठमाडौं । शुक्रबारदेखि रिलिजमा आएको फिल्म ‘छक्का पन्जा ४’ले बक्स अफिसमा धमाका मच्चाइरहेको छ । शनिबार र आइतबार फिल्मको व्यापार सुखद रहेपछि सोमबार उपत्यका होली बिदाले पनि फिल्मले अपार सफलता पाएको छ ।

आज तराइ होली बिदा र भोली नारी दिवस परेकाले पनि फिल्मको व्यापारमा फेरि उछाल आउने पक्का छ । हेमराज बीसीको निर्देशनमा तयार भएको यो फिल्ममा दीपकराज गिरी, केदार घिमिरे, वुद्दि तामाङ, दीपाश्री निरौला, बेनिशा हमाल, मलिना जोशी लगायतका कलाकारको अभिनय छ ।

फिल्मले नेपाली फिल्म क्षेत्रमा फेरि एकपटक चहलपहल ल्याइदिएको छ । यो साता केही सार्वजनिक बिदा समेत परेकाले पनि फिल्म फाइदै फाइदामा परेको छ ।

यो फिल्मको कथामा एउटा गुन्डाबाट राजनीतिज्ञ हुँदै मन्त्री बन्न लागेको ‘राजा’को यात्रालाई प्रस्तुत गरेको छ । सांसद बनेसँगै उनले मिडियाको साथमा गरेको काम कारवाहीलाई फिल्ममा देखाइएको छ । यसमा राजालाई मन्त्री बनाउने प्रस्ताव गरिन्छ र त्यसपछिका कथावस्तु पिटिकल तरिकाले प्रस्तुत गरिएको छ ।

यो फिल्मले समाजको कथालाई मिठो तरिकाले प्रस्तुत गरेको छ । विशेषगरि, राजनीतिकतन्त्र र गणतन्त्रमा कर्मचारीतन्त्र हाबी हुँदा जनताले भोग्नु परेको समस्या, कर्मचारीतन्त्रमाथि धावा बोल्न उदाएको राजाको कथा फिल्ममा प्रस्तुत गरिएको छ । यहि फिल्मको शिर्ष गीत मंगलबार सार्वजनिक भएको छ । ‘सिरूपाते जुँगामा’ बोलको गीत पश्चिमेली लवजको भएकाले पनि सबैको मन जित्नेमा निमार्ण पक्ष ढुक्क छ ।

चलचित्र प्रदर्शनको पाँच दिनपछि मंगलवार यो गीत युट्युबमा सार्वजनिक गरिएको हो । यो गीतको टुक्का टिकटक लगायतका सामाजिक सञ्जालमा यसअघि नै हिट भइसकेको छ । कथा खुल्नसक्ने भएका कारण निर्माण टिमले चलचित्र रिलिजको केही दिनपछि मात्रै यो गीत सार्वजनिक गरेको हो ।

शंकर अधिकारी ‘घायल’को शब्द रहेको यस गीतमा बाबुल गिरीको संगीत एवं स्वर छ । आयुष खतिवडा र पवित्रा गुरुङले गीतमा कोरस स्वर दिएका छन् ।

भिडियोमा चलचित्रका कलाकारहरू दीपकराज गिरी र बेनिशा हमाललाई रोमान्टिक रुपमा प्रस्तुत गरिएको छ । केदार प्रसाद घिमिरे, दीपाश्री निरौला, राज आचार्य लगायतका अन्य कलाकारहरू समेत भिडियोमा प्रस्तुत छन् ।हेमराजको निर्देशन रहेको ‘छक्का पञ्जा ४’ले चार दिनमा ‘सोमबार’ ६ करोड हाराहारीको कलेक्सन गरिसकेको छ ।