चितवन-२ मा कांग्रेसले जितनारायण श्रेष्ठलाई उम्मेदवार बनाउने

१६ चैत, काठमाडौं । नेपाली कांग्रेसले चितवनका पूर्व जिल्ला सभापति जीतनारायण श्रेष्ठलाई चितवन-२ मा प्रतिनिधिसभा सदस्यका लागि उम्मेदवार बनाउने निर्णय गरेको छ ।

सानेपास्थित पार्टी केन्द्रीय कार्यालयमा बसेको कार्यसम्पादन समितिको बैठकले श्रेष्ठलाई उम्मेदवार बनाउने निर्णय गरेको हो । चितवन-२ मा आगामी वैशाख १० गते प्रतिनिधसभा सदस्यका लागि उपनिर्वाचन हुँदैछ ।

यसअघिका प्रतिनिधिसभा सदस्य रवि लामिछाने नागरिकता विवादमा दोषी ठहर भई पदमुक्त भएपछि यो क्षेत्रमा उपनिर्वाचन हुन लागेको हो । रास्वपाबाट पुन: लामिछाने र एमालेबाट गोपी श्रेष्ठ निर्वाचनमा उठ्ने चर्चा छ।

उम्मेदवारका लागि जिल्ला समितिले सिफारिस गरेका ११ जनाको नाममध्ये श्रेष्ठले टिकट पाएका हुन् ।  श्रेष्ठलाई पार्टीको उम्मेदवार तोकिएसँगै निर्वाचनको प्रचार प्रसारसहितको छिटै तयारी थालिने बताइएको छ ।