सिन्धुलीमा मल कारखाना निर्माणसम्बन्धी फाइल प्रधानमन्त्रीलाई

२२ चैत, काठमाडौं । सिन्धुलीमा रासायनिक मल कारखाना निर्माणसम्बन्धी फाइल प्रधानमन्त्री पुष्पकमल दाहाल ‘प्रचण्ड’लाई बुझाएका छन् । बागमती प्रदेशका पूर्वमुख्यमन्त्री राजेन्द्रप्रसाद पाण्डेले प्रदेश सरकारले सिन्धुलीमा रासायनिक मल कारखाना निर्माण अघि बढाइसकेको जानकारीसहित फाइल बुधबार प्रम प्रचण्डलाई बुझाएका हुन् । 

सिंहदरबारमा प्रधानमन्त्री प्रचण्डलाई भेट गरेर उनले आफू मुख्यमन्त्री हुँदा थाइल्याण्डको एक कम्पनीसँग सहकार्य गरेर रासायनिक मल कारखाना खोल्ने प्रक्रिया अगाडि बढाएको जानकारी गराए । सो अवसरमा उनले मल कारखाना स्थापनासम्बन्धी फाइल पनि प्रधानमन्त्री प्रचण्डलाई हस्तान्तरण गरे । 

उद्योग स्थापनाका लागि गत पुस ६ मा सिन्धुलीको हरिहरपुरगढी गाउँपालिका–३ बागमती नदी किनारको ३८६ बिघा जग्गासमेत छनोट समेत भइसकेको पनि उनले बताए ।  औद्योगिक क्षेत्र निर्माणका लागि हाल सम्भाव्यता अध्ययन सम्पन्न भइसकेको भन्दै पाण्डेले जग्गा भाडामा लगाउने निर्णय संघीय सरकारले गर्नुपर्ने बताए ।

‘अहिलेको अवस्थामा हाम्रो देशमा १० देखि १२ लाख मेट्रिक टन आवश्यक पर्छ । त्यसका लागि केही समयअघि थाइल्यान्डको मेहाछाद इन्टरनेशनल कम्पनीसंग सम्झौता समेत भइसकेको उनको भनाइ छ । उद्योग स्थापना हुने स्थानको भूमि व्यवस्थापन गर्ने कार्य मन्त्रिपरिषदले गर्नुपर्ने पाण्डेले बताए ।