राजश्व संकलन बढाउन जग्गाकाे कित्ताकाट खोल्ने सरकारको तयारी

२७ चैत, काठमाडौं । सरकारले पुरानै अवस्थामा जग्गाको कित्ताकाट खोल्ने तयारी गरेको छ । प्रधानमन्त्री पुष्पकमल दाहाल ‘प्रचण्ड’ले सोमबार पोखराबाट आएका उद्योगी व्यवसायीहरुको छलफलमा भूउपयोग नीति अनुसार जग्गा वर्गीकरण नगरी पुरानै स्थितिमा कित्ताकाट खुला गर्ने तयारी भइरहेको जानकारी दिएका छन् । 

बजारमा तरलता अभाव हुनुको एउटा कारण जग्गामा पैसा फस्नु हो भन्ने निष्कर्षमा सरकार पुगेको र त्यसलाई हटाउने मध्ये एउटा उपाय जग्गाको कित्ताकाट खोल्नु तयारी भइरहेको उनले बताए । 

जग्गामा ठूलो पैसा फसिरहेको र कित्ताकाट रोकिएका कारण बेचबिखन रोकिएर बजारमा पैसा नपुगेको उनको भनाइ थियो । ‘तत्कालको क्राइसिस म्यानेज गर्नकै लागि पनि कित्ताकाट सुरु गरिन्छ, बाँकी हुन सक्ने जति कोशिस गर्छौं’ प्रधानमन्त्रीको भनाइ उदृत गर्दै छलफलपछि एक सहभागीले भने ।

सरकारले यसै वर्ष ल्याएको भू-उपयोग नियमावलीअनुसार स्थानीय तहले कृषि र गैरकृषियोग्य जग्गाको वर्गीकरणको काम सकेपछि मात्र कित्ताकाट खोल्नुपर्नेछ । वर्गीकरणकै काम पूरा नहुँदा कित्ताकाट रोकिएको छ । यसबाट जग्गामा लगानी गर्नेहरुले आफूहरु समस्यामा परेको दाबी गर्दै आएका छन् । ललितपुर र भक्तपुर जिल्लामा वर्गीकरणको सकिने चरणमा रहेको जिल्लाभित्रका स्थानीय तहरुले जनाउँदै आएक छन् । 

सोही छलफलमा प्रधानमन्त्री प्रचण्डले बैंकको ब्याज दरलाई एकल अंकमा झार्ने प्रयास रहेको बताए । ठूलो मात्रामा राजश्व संकलन हुने क्षेत्रमध्ये घरजग्गा कारोबार (मालपोत) रहेको र बेचबिखन नहुँदा लक्ष्यअनुसार राजश्व संकलन नसकेको अर्थमन्त्रालयको भनाइ छ । 

साथै राजश्व चुहावट रोक्न सरकारले कुनै कसर बाँकी नराख्ने बताउँदै संकलनमा सहयोग गर्न उनले उद्याेगीहरूसँग आग्रह गरे ।

अर्थ सचिव तोय रायले आइतबार मात्र  एक कार्यक्रममा राजश्व संकलन निकै कम मात्रामा भइरहेको र सामाजिक सुरक्षा भत्ता खुवाउने कामलाई सरकारले धेरै समय अगाडि लैजान नसक्ने अवस्था देखिएको बताएका थिए ।