सभापति देउवाले राखे कांग्रेसमा समीक्षा गर्नुपर्ने प्रस्ताव

११ वैशाख, काठमाडौं । नेपाली कांग्रेसका सभापति शेरबहादुर देउवाले पार्टी भित्र गम्भिर समीक्षा गर्नु प्रस्ताव राखेका छन् । उनले उपनिर्वाचनको प्रारम्भिक परिणामले पार्टीसामू चुनौती खडा भएको भन्दै पार्टीभित्र समीक्षा गर्नुपर्ने प्रस्ताव गरेका हुन् । सोमवार संसद भवनमा बसेको कांग्रेस संसदीय दलको बैठकमा सभापति देउवाले कांग्रेस गम्भिर समीक्षाको मोडमा पुगेको बताएका हुन् । 

यस अघि पार्टीभित्र चर्को रुपमा निर्वाचनको समीक्षा हुने पर्ने अवाज उठाउँदा देउवाले अटेर गर्दै केन्द्रीय समितिको बैठकसमेत बोलाउन मानेका थिएनन् । प्रतिनिधिसभा रिक्त रहेका तीन क्षेत्रको  उपनिर्वाचनमा पनि ठूला राजनीतिक दलप्रति जनताले चासो नदेखाएको भन्दै उनले यसको कांग्रेसले समीक्षा गर्न आवश्य भएकोमा जोड दिएका थिए । 

संसदीय दलको बैठकमा सभापति देउवाले ठूला पार्टीप्रति जनताको त्यत्ति चासो नभएको देखिएकोले पार्टीलाई सुधारेर जानुपर्ने आवश्यकता औंल्याए हुन् । बैठकमा सहभागि नेताका अनुसार सभापति देउवाले अहिले देशको विषम परिस्थिति रहेको र अब पार्टीलाई कसरी अगाडी लाने भन्ने कुरामा ठोस नीति र योजना बउनाउनु पर्ने बताएका थिए । 

उपनिर्वाचनले पनि ठूला पार्टीप्रति जनताको त्यत्ति चासो नभएको जस्तो देखिनुमा आफुहरुकै कमजोरी रहेको देउवाको भनाइ थियो । उनले अझ पार्टीलाई सुधारेर जानुपर्ने आवश्यक्तामा जोड दिन सबैलाई आग्रह गरेका थिए । देउवाले बैठकमा आगामी वर्षको बजेट कसरी ल्याउने भन्नेबारेमा पनि सांसदहरूसँग चासो राखेका छन् । उनले अर्थमन्त्री प्रकाशशरण महतलाई अहिले देशको आर्थिक अवस्था राम्रो नभएको र बजेट ल्याउँदा जनतासँग जोडिने खालका कार्यक्रम ल्याउन सुझाव दिएका थिए । 

सांसदहरूले आगामी बजेटमा जनताका माग कसरी सम्बोधन गर्ने ? पुराना आयोजना सम्पन्न गर्ने र नयाँ आयोजना ल्याउने कुरामा विशेष जोड हुनुपर्ने धारणा राखेका छन् । आज धेरै सांसदले बोलेको र सबैले बोल्ने क्रम नसकिएकाले भोलि १० बजे पनि बैठक बस्ने बताइएको छ । सोमबार आगामी बजेटमा जनताका माग र कुरा कसरी सम्बोधन गर्ने, आयोजना पुराना कसरी सक्ने र नयाँ योजना कसरी थप्ने भन्ने बारेमा नै छलफल हुनेछ ।