अवैध रुपमा भारतबाट भित्र्याएको गहुँसहित ट्रयाक्टर नियन्त्रणमा

२२ वैशाख, बीरगन्ज । पर्साबाट प्रहरीले अवैध रुपमा भारतबाट भित्र्याएको गहुँसहित एक ट्रयाक्टर नियन्त्रणमा लिएको छ । जिल्लाको पोखरिया नगरपालिका वडा नं ४ सत्वरियाबाट शुक्रबार बिहान करिब ४ बजे प्रहरी अवैध गहुँसहित एउटा ट्रयाक्टर नियन्त्रणमा लिएको हो ।

गोप्य सूचनाका आधारमा इलाका प्रहरी कार्यालय पोखरीयाबाट खटेको प्रहरी गस्तीको टोलीले कालिका माई गाउँपालिकाबाट पोखरिया तर्फ आउँदै गरेको अवस्थामा ट्रयाक्टर नियन्त्रणमा लिएको जनाएको छ । 

भारतको कठियामथियाबाट नेपालको सबैठावा नाका हुँदै अवैध तरिकाले साइकलको माध्यमले कालिका माई गाउँपालिकामा ल्याई भण्डार गरी स्थानीय किसानको नाममा खरिद विल ओसार पसार चोरी निकासी गरिरहेको गोप्य सूचनाको आधारमा इलाका प्रहरी कार्यालय पोखरीयाबाट खटि गएको टोलीले ना ३ त २२९५ नम्बरको ट्रयाक्टर नियन्त्रणमा लिएको बताएको छ । 

ईलाका प्रहरी कार्यालय पोखरीयाका प्रहरी निरीक्षक मोहन बिक्रम केसीले भारतबाट चोरी निकासी गरी बिना भन्सारको नेपालमा ल्याई बेचबिखन गरिरहेको सूचना पाएपछि गहुँसहितको ट्रयाक्टर नियन्त्रणमा लिएको बताएका छन् । अनलाइन विल नभई मात्र चलानी विल भएकोले अनुसन्धानको प्रक्रिया अगाडि बढाइएको उनले बताए ।