कुटनीतिक दवावपछि छलफलमा बसे तीन नेता, अब कसरी जान्छ नक्कली शरणार्थी बनाई ठगेको विषय ?

२६ वैशाख, काठमाडौं । समसामयिक राजनीतिक र संसदमा विचाराधीन रहेका विधेयकमाथि छलफल भएको भनिए पनि नेपालीलाई नक्कली शरणार्थी बनाएर अमेरिका पठाउने गिरोहलाई सघाएको र यस बापत करोडौं रकम लिएको विषयमा भइरहेको अनुसन्धानबारे प्रमुख दलका तीन नेताले मंगलबार गहन रुपमा छलफल गरेका छन् । उनीहरूबीच भएको छलफलको मूल विषय अहिलेसम्म बाहिर आएको छैन । 

मंगलबार बिहान प्रधानमन्त्रीको सरकारी निवास बालुवाटारमा नेपाली कांग्रेसका सभापति शेरबहादुर देउवा, प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीबीच भएको छलफलबारे तीन नेताले कुनै प्रतिक्रिया नदिए पनि शरणार्थी बनाएर ठगी गरेको मुद्दाका विषयमा छलफल भएको स्रोतको भनाइ छ । नक्कली भुटानी शरणार्थी प्रकरणमा सत्तापक्ष र प्रतिपक्षका नेताहरू नै जोडिएका समाचारहरू सार्वजनिक भएपछि अमेरिका लगायतका देशले प्रधानमन्त्रीसँग जवाफ मागेपछि उनीहरुबीच छलफल भएको हो । 

प्रधानमन्त्री निकट स्रोतले दिएको जानकारी अनुसार नेपाल स्थित अमेरिकी दूतावासले नक्कली शरणार्थी बनाएर अमेरिका पठाएको विषयमा भइरहेको अनुसन्धान र संलग्न रहेका नेताहरूमाथि हुने कारबाहीबारे प्रश्न उठाएपछि अब यो विषयलाई कसरी अगाडि बढाउने, सरकारले कस्तो कदम चाल्ने र अमेरिकालाई के जवाफ दिने भन्ने बारे साझा राय बनाउनका लागि प्रधानमन्त्रीले सभापति देउवा र अध्यक्ष ओलीलाई मंगलबार बिहान बालुवाटारमा बोलाएका थिए । अमेरिकी दूतावासले राखेको जिज्ञासाको विषयमा सोमबार राती पनि प्रधानमन्त्री प्रचण्डले देउवा र ओलीलाई फोनमार्फत पनि जानकारी गराएका थिए ।    

नक्कली शरणार्थी बनाएर अमेरिका पठाएको विषयले अमेरिकी सदनमा पनि प्रवेश पाएको छ । स्रोतले भन्यो अमेरिका नेपालले यो विषयलाई अगाडि बढाउन चाहेको छ वा यतिकैमा थामथुम बनाउने रणनीतिमा छ भन्ने कुराको जवाफ नेपालबाट खोजिरहेको छ । नक्कली शरणार्थी प्रकरण सतहमा आएपछि प्रधानमन्त्रीसँग कूटनीतिक निकायले पनि प्रश्न उठाएका छन् । कूटनीतिक र दातृ निकायले नेपालको यो प्रसंगले आगामी दिनमा नेपालमाथि दिइँदै आएको सहयोगका विषयमा अन्य देशहरूले चासो राख्ने भएकाले पनि उनीहरूले सरकारको जवाफ खोजेका छन् ।  

यिनै विषय छलफलका लागि प्रधानमन्त्रीले दुई नेतालाई बोलाएको प्रधानमन्त्री निकट स्रोतको भनाइ छ । यद्यपि प्रधानमन्त्रीका प्रेस सल्लाहकार गोविन्द आचार्यले भने विधेयकबारे मात्र छलफल भएको जानकारी दिएका छन् । नेपालस्थित कूटनीतिक नियोगले नेपाली कांग्रेस र नेकपा एमालेबाट पनि यो प्रकरणबारे जिज्ञासा राखेका छन् । तर, तीन नेताको छलफलको निचोड के आयो र प्रधानमन्त्रीले के जवाफ दिन्छ भन्ने कुरा बाहिर आएको छैन । ठगीका विषयमा अमेरिकी दूतावासले चासो राखेपछि प्रधानमन्त्री प्रचण्डले नेपाल प्रहरीका महानिरीक्षककाे अमेरिका भ्रमण पनि रुद्ध गराएका थिए ।  

कूटनीतिक तहबाट मात्र हैन नेपालमै पनि यो ठगी प्रकरणमा मुछिएका नेता र अनुसन्धानको विषयमा अब के हुन्छ भन्ने जवाफ जनताले दलहरूसँग मागिरहेका छन् । एमाले अध्यक्ष ओलीले नक्कली शरणार्थी बनाएर ठगी गर्ने माथि भइरहेको अनुसन्धानमा आफ्नो पक्षका नेताहरूको बचाउन गर्ने र अरू दललाई उक्साउने भन्दा अरू केही बोलेका छैनन् । कांग्रेस सभापति देउवाले त यो विषयमा मुखसमेत खोलेका छैनन् । ओलीले प्रधानमन्त्रीले एमाले नेताहरूलाई फसाउन र अरूलाई उम्काउन खोजेको आरोप मात्र लगाएका छन् । सोमबार पार्टीसम्वद्ध राष्ट्रिय युवा संघको बैठकमा ओलीले करिब ४५ मिनेट सम्बोधन गर्दा भुटानी शरणार्थी प्रकरणबारे प्रधानमन्त्रीमाथि निरन्तर प्रश्न उठाएका थिए । 

यति ठूलो प्रकरणमा नाम जोडिएका आफ्ना सांसदहरुका बारेमा कांग्रेसले बोलेको छैन । आफ्नो पार्टीका सचिव समेत रहेका सांसद, पूर्व उपप्रधानमन्त्री लगायतबारे उठेका गम्भीर अभियोगबारे एमालेले कुनै संस्थागत जवाफ पनि दिएको छैन । सुशासनको नारा दिनेहरूले आफ्नो दलभित्रका पात्रहरू, उनीहरूले भोगिरहेको जीवनशैली आदि विषयमा आफैं अघि सरेर छानबिन र अनुगमन गर्नुपर्ने हो । तर, दुवै दल चुप छन संस्थागत विचार आएको छैन । कूटनीतिक दवाव बढेपछि नेताहरू यो प्रकरणमाथि भइरहेको अनुसन्धानबारे मंगलबार छलफलमा भने जुटपनि यसको निचोड भने आएको छैन ।