हावाहुरीका कारण देशका अधिकांश स्थानमा छैन बिजुली

२ जेठ, काठमाडौं । दुई दिनदेखि मुलुकभरजसो आएको हावाहुरीले देशभरका विद्युत् वितरणमा समस्या परेको छ । आइतबार बेलुका र सोमबार बेलुका आएको हावाहुरीका कारण देशभरको वितरण प्रणालीमा अवरोध उत्पन्न भएको नेपाल विद्युत् प्राधिकरणले जनाएको छ । 

आइतबार बेलुका हावाहुरीसहितको वर्षात् भएको थियो । हावाहुरीले राष्ट्रिय प्रसारणलाइनमा क्षति पर्याएको प्राधिकरणका प्रवक्ता सुरेश भट्टराईले जानकारी दिए । सोमबार दिनभर पनि सबै राष्ट्रिय ग्रिडमा समस्या आएको उनले बताए । 

ग्रिडमा समस्या आएका कारण वितरण प्रणाली अवरुद्ध भएको जनाएको छ । अहिले पनि देशका थुप्रै स्थानमा बिजुली अवरुद्ध रहेको प्राधिकरणको भनाइ छ । थप हावाहुरी नचले मंगलबार बेलुकासम्म सबै क्षेत्रमा बिजुली बल्ने जनाइएको छ । 

हावाहुरीसँगै चट्याङ

हावाहुरीसँगै लागेको चट्याङका कारण  दर्जभन्दा बढी मानिस घाइते भएका छन् । दैलेखको डुङ्गेश्वर गाउँपालिका–२ लाँकुरीमा गएराति सुतिरहेका बेला चट्याङ लागेर एकै परिवारका ४ जना घाइते भएका छन् । 

घाइतेहरु २१ वर्षीय पारस विक, १६ वर्षीया हेमा विक, १७ वर्षीया पूर्णा विक र २० वर्षीया पुष्पा विक घाइते भएका जिल्ला प्रहरी कार्यालयका प्रहरी प्रमुख किशोर लम्सालले जानकारी दिए । उनीहरुको उपचार भइरहेको र सबै खतरामुक्त रहेको उनले बताए ।