अर्घाखाँचीको आगलागी घटनाका कारण खुल्याे, वृद्धसहित ४ जना पक्राउ

३ जेठ, काठमाडौं । प्रहरीले गत हप्ता अर्घाखाँचीको भूमिकास्थानमा भएको भीषण आगलागीको घटनामा संलग्नमध्ये ४ जनालाई पक्राउ गरेको छ ।

वैशाख २६ गते भूमिकास्थान नगरपालिका–२ स्थित तिरतिरे जंगलमा लगाइएको डढेलो घरमा सल्किन पुग्दा आगलागीमा परी सोही ठाउँ बेल्बासे टोलका ७२ वर्षीय पिताम्बर बेल्बासे, ३६ वर्षीय माधव बेल्बासे, ५२ वर्षीय घनश्याम बेल्बासे र ५५ वर्षीय पदमप्रसाद बेल्बासे गरी ४ जनाको मृत्य भएको थियो । घाइते भएका उनीहरुको उपचारका क्रममा वैशाख २७ गते नेपालगन्जको विभिन्न अस्पतालमा मृत्यु भएको थियो । घाइते भएकी २६ वर्षीया अस्मिता बेल्बासे उपचाररत छिन् । 

सोही घटनाको अनुसन्धान गरिरहेको प्रहरीले भूमिकास्थान नपा–२ का ३६ वर्षीय दिनेश थापा, १८ वर्षीय दिपक विक, ७० वर्षीय देवीराम बेल्बासे र ३६ वर्षीय धर्मराज बेल्बासेलाई पक्राउ गरेको छ । वैशाख ३१ गते पक्राउ गरिएका उनीहरुलाई मंगलबार मात्र सार्वजनिक गरिएको हो । 

अभियुक्तहरुलाई ज्यानसम्बन्धी कसुरमा जिल्ला अदालतबाट ४ दिने म्याद लिई अनुसन्धान भइरहेको जिल्ला प्रहरी कार्यालय अर्घाखाँचीका सूचना अधिकारी प्रहरी निरिक्षक कृष्णप्रसाद घिमिरेले जानकारी दिए ।

वैशाख २६ गते बिहान घाँस काट्न गएका उनीहरूले जंगल क्षेत्रमा आगो लगाएर फरार भएको प्रारम्भिक अनुसन्धानमा खुलेको बताइएको छ । उनीहरुले जंगली जनावरले सताएका कारण आगो लगाएको बयान दिएको दाबी प्रहरीको छ । घटनाकाे अन्य व्यक्तिकाे पनि संलग्नता हुन सक्ने भन्दै सुक्ष्म अनुसन्धान जारी राखेकाे छ ।