रञ्जिताले बोलाइन् पार्टी पदाधिकारी बैठक

४ जेठ, काठमाडौं । सत्ता साझेदार दल नागरिक उन्मुक्ति पार्टी (नाउपा)का अध्यक्ष रञ्जिता श्रेष्ठले पार्टीको पदाधिकारी बैठक बोलाएकी छन् । पार्टीका संरक्षक रेशमलाल चौधरीलाई जिल्ला र उच्च अदालतले गरेको जन्मकैदको फैसलापछि बुधबारदेखि नेपाल बन्दसहितको कडा आन्दोलनमा उत्रिएको नाउपाले आज दिउँसो १  बजे काठमाडौंमा उप्लब्ध पदाधिकारीहरुको बैठक बोलाएकी हुन् । 

बैठकमा आन्दोलनका कार्यक्रम व्यवस्थित गर्न र सर्वोच्च अदालतको फैसलाबारे एकीकृत धारणा तय गर्न बैठक बस्न लागेको महासचिव रतन थापाले बताए । 

नाउपाको मुख्य माग कैलालीको टिकापुर घटनामाथि तयार पारिएको लाल आयोगको प्रतिवेदन सार्वजनिक गर्नुपर्ने, टिकापुर घटनालाई अपराधिक नभई राजनीतिक घटनाको रुपमा व्याख्या गरिनुपर्ने, घटनासँग जोडेर बन्दी बनाइएका सबैको निसर्त रिहाइ गरिनुपर्ने, सबै मुद्दा खारेज गरिनुपर्ने रहेका छन् । लालआयोगको प्रतिवेदन जेठ ५ गतेसम्म सार्वजनिक नगरिए जेठ ६ गतेदेखि १० गतेसम्म नेपाल बन्द गर्ने घोषणा गरिएको छ । 

टीकापुर घटनाका जन्मकैद सजाय भोगिरहेका रेशमलाल सहित ४ जनालाई सर्वोच्च अदालतले पनि मंगलबार मात्रै दोषी ठहर गर्दै जिल्ला र उच्चको फैसला सदर गरेको छ । फैसलापछि रेशमलालले सर्वोच्चको फैसला स्वीकार्ने र पुनरावलोकनमा जाने प्रतिक्रिया दिइसकेका छन् । तर पार्टीले भने सर्वोच्चको फैसला लाल आयोगको प्रतिवेदनबारे नबोलेको भन्दै झुटा मुद्दा खारेजी र बन्दी रिहाईसम्बन्धी पूर्व मागलाई जोेडदार रुपमा सरकार, सदन र सडकबाट उठाउने निष्कर्षमा नाउपा पुगेकाे हाे । जायज माग माग पूरा नभए कडा आन्दोलनको घोषणा गर्ने नेता लक्ष्मण थारुले बताए । सरकारमै बसेर ‘क्याबिनेट आन्दोलन’ गर्ने नीति पार्टीको रहेको उनले बताए ।

नाउपा अहिले पार्टी अध्यक्ष श्रेष्ठको नेतृत्वमा सरकारमा सहभागी छ । उनले भूमी व्यवस्था मन्त्रालयको जिम्मेवारी सम्हालिरहेका छन् । नाउपाको घोषित आन्दोलनमा मुख्य रुपमा लाल आयोगको प्रतिवेदन सार्वजनिक गरिनुपर्ने, अन्यथा रेशमलाललाई कानून बनाएरै ‘फासी’ चढाउन माग गरिएको छ ।

टिकापुर घटनामा सर्वोच्चबाट २१ जना दोषी ठहर भएका छन् । सिताराम भनिने सन्तकुमार चौधरी र गंगाराम चौधरीले सफाइ पाएका छन् । सन्तकुमार बुधबार नै रिहा भइसकेका छन् भने गंगारामालाई अर्को ज्यान मुद्दा रहेका कारण रिहाइ भएनन् ।