कतै नभएको छाडापन नेपालमा आयो, सांस्कृतिक पतनले युट्युब हेर्न पनि एकान्तमा जानु पर्छः ओली

१७ जेठ, काठमाडौं । नेकपा एमालेका अध्यक्ष एवं पूर्व प्रधानमन्त्री केपी शर्मा ओलीले नेपालमा छाडा संस्कृति मौलाएको बताएका छन् । उनले देशका सबै कुरा विग्रदा चाँडो सुधार गर्न सकिने भएपनि संस्कृति बिग्रिएमा पुस्तौँसम्म सुधार्न नसकिने बताएका छन् । सुनै सुनले ढाकिएको देखिने गरी आफ्नो फोटो सामाजिक सञ्जालमा ट्रोल गरिएको प्रति उनले  गुनासो गरेका छन् । 

बुधबार च्यासलस्थित पार्टी केन्द्रीय कार्यालयमा पार्टी प्रवेश गरेका कलाकारहरूलाई स्वागत गर्दै अध्यक्ष ओलीले आफूले आमा बित्दा र एकपटक साथीले दिएको औँठी केही समय लगाएको तर त्यसबाहेक आफूले सुनको औँठी नलगाएको बताए । औँठी लगाउने रूचिसमेत नभएको मान्छेलाई जिउ भरि सुनै सुनले डाकिएको फोटो सामाजिक सञ्जालमा ट्रोल गरेर झूटको खेती गरेको भन्दै उनले आपत्तिसमेत जनाए । 

गत साता प्रतिनिधिसभामा पशुपतिनाथ मन्दिरको जलहरी प्रकरणमा प्रश्न उठेपछि अध्यक्ष ओलीको शरीरभर सुनले भरिएको तस्विर सामाजिक सञ्जालमा भाइरल बनाइएको थियो । बुधबारको कार्यक्रममा ओलीले उक्त तस्विरप्रति लक्षित गर्दै नेपाली समाज गलत दिशामा उन्मुख भएको टिप्पणी गरेका थिए ।
 
उनले त्यो सत्यलाई बंग्याएर आफ्नो सुनै सुनले ढाकेको आफ्नो फोटो सामाजिक सञ्जालमा ट्रोल गरिनु आपत्तिजनक रहेको बताए । आफूसँग भएको ज्ञान, कला र क्षमताको दुरुपयोग गरेर यस्तो खालको गतिविधि गरिनु मुलुकका लागि दुःखको कुरा भएको पनि अध्यक्ष ओलीले बताए । 

इमानमा अड्न नखोज्ने अवस्थामा नेपाली समाज पुगेको उल्लेख गर्दै उनले त्यसबाट जोगाउनका लागि चेतनाको बिगुल फुक्न पनि कलाकारहरूलाई आह्वान गरे । ओलीले समाजमा नकारात्मक सोच फैलिएको र पतनोन्मुख भएको भन्दै चिन्ता व्यक्त गरे । दुनियाँलाई नै सभ्यता र संस्कृतिको पाठ सिकाउने समाज पछिल्लो समय विकृतितर्फ भासिँदै गएकोमा उनले चिन्ता व्यक्त गरेका हुन् ।

उनले भने, ‘अहिले युट्युब हेर्न सकिँदैन । एकान्तमा जानु पर्ने हुन्छ । हामी सभ्य समाजमा छौं कि विकृतितर्फ भासिँदै गएको समाजमा छौं ? अचम्म लाग्दैछ । यही देशबाट सभ्यता र संस्कृतिको सुरुवात भयो, त्यो देश त्यो भूमिमा जसको पुर्खाले दुनियाँमा सभ्यता भन्ने चिजको सुरुवात गरे, संस्कृति भन्ने चिजको सुरुवात गरे, सामाजिक प्रबन्ध भन्ने चिजको सुरुवात गरे, उत्कृष्ट मानवीय भावनाहरुको सुरुवात गरे । अहिले दुनियाँमा कतै नभएको छाडापन यहीँ देखिएको छ ।’ 

समाज र संस्कृति बिग्रिँदा त्यसलाई सुधार्न निकै मुस्किल हुने भन्दै ओलीले नेपाली समाज बिग्रिएकोमा चिन्ता व्यक्त गरेका हुन् । उनले भनेका छन्, ’राजनीति बिग्रियो भने १–२ वटा चुनावमा शिक्षा लिएर सही बनाउन सकिन्छ । अर्थतन्त्र बिग्रियो भने १–२ वर्षको बजेटबाट पञ्चवर्षीय योजनाबाट सुधार्न सकिन्छ । देशको संस्कृति बिग्रियो भने, सांस्कृतिक पतन भयो भने त्यो उठाउनका लागि पुस्तौंसम्म लाग्छ ।’