समाजवादी मोर्चा नेपाली राजनीतिमा नयाँ प्रयोग हो : विप्लव

४ असार, काठमाडौं । नेपाल कम्युनिष्ट पार्टी (नेकपा)का महासचिव नेत्रविक्रम चन्द ‘विप्लव’ले समाजवादी मोर्चा नेपाल गठन नेपाली राजनीतिमा नयाँ प्रयोग भएको बताएका छन् ।

काठमाडौंमा आज भएको मोर्चाको घोषणा कार्यक्रममा बोल्दै महासचिव विप्लवले देशको सार्वभौमिकता र राष्ट्रियतामाथि साम्राज्यवादी शक्तिले पछिल्लो समयमा राजनीतिक, भौगोलिक, सांस्कृति र आर्थिक हस्तक्षेप बढेको भन्दै समाजवादी मोर्चाले त्यसलाई चिर्ने र भत्काइदिने बताए । 

१० वर्षे सशस्त्र द्वन्द्वका बेला क्रान्तिकारीहरुले लिएका स्वास्थ्य, शिक्षा, रोजगारसहित पूर्ण अधिकार र पूर्ण स्वाधीनताको उद्देश्य पूरा गर्न बाँकी रहेको भन्दै त्यसलाई मोर्चाले पूरा गर्न भूमिका खेल्ने बताए । 

देशमाथिको हुने सबैखाले हस्तक्षेप र भूमि अतिक्रमण रत्तिभर नसहने भन्दै अधिकार प्राप्ति र सावैभौमिकताको रक्षाका लागि मोर्चाले राजनीतिक नेतृत्व गर्ने उनले बताए । उनले अहिले नागरिक सबैतिरबाट हैरानी र अत्यासमा परेको तर हैरानी र अत्यास मात्र देख्दा हस्तक्षेप र दमन झनै बढ्ने भन्दै निराश नहुन आग्रह गरे ।