घट्यो आन्तरिक हवाई भाडा, काठमाडौं-धनगढी रुटमा ४४५ रुपैयाँले कमी

६ असार, काठमाडौं । आन्तरिक हवाई उडानको भाडा घटेको छ । नेपाल नागरिक उड्ययन प्राधिकरणले बुधबार डोमेस्टिक उडानतर्फको फ्यूल सर्जाइकल चार्ज घटाएसँगै हवाई भाडा घटेको हो । 

प्राधिकरणले जारी गरेको नयाँ फ्यूल सर्जाइकल मूल्य सूचीअनुसार सबैभन्दा बढी काठमाडौं–धनगढीको ४४५ रुपैयाँले कमी आएको छ । योसँगै काठमाडौं–धनगढीको नयाँ भाडा दर ६ हजार ६२५ रुपैयाँ कायम भएको छ । सबैभन्दा कम काठमाडौं–सिमराको फ्यूल सर्जाइकल चार्ज ९० रुपैयाँले घट्न पुगेको छ ।

यसअघि काठमाडौं–सिमरा चार्ज एक हजार ४४० रुपैयाँ रहेकोमा भाडा घटेसँगै एक हजार ३५० रुपैयाँ कायम भएको छ । काठमाडौं–भद्रपुरमा ४ हजार ८ सय ५ बाट ४ हजार ५ सय ५ मा झरेको भने काठमाडौं–विराटनगरको भाडा ३ हजार ८ सय ४० बाट घटेर ३ हजार ६ सय कायम भएको छ ।

मंगलबार नेपाल आयल निगमले हवाई इन्धनको मूल्य आन्तरिकतर्फ प्रतिलिटर १० रुपैयाँले घटाएसँगै हवाई भाडामा समायोजन गरिएको हो ।