सुदूरपश्चिमका मन्त्री सवार गाडी दुर्घटनाको छानबिन गर्न समिति गठन

७ असार, काठमाडौं । सुदूरपश्चिम प्रदेश सरकारले आन्तरिक मामिला तथा कानुन मन्त्री पृथ्वीबहादुर सिंहको उनी सवार गाडी दुर्घटनामा परी निधन भएको सम्बन्धमा छानबिन गर्न समिति गठन गरेको छ ।

बिहीबार बसेको मन्त्रिपरिषद् बैठकले मन्त्री सिंहसहित ३ जनाको ज्यान जानेगरी भएको बझाङको केदास्यूँ गाउँपालिका–१ १ झारछडामा मंगलबार दिउँसो सु.प.प्र. ००१ झ ४८० नम्बरको जीप दुर्घटनाको छानबिन गर्न मुख्यमन्त्री तथा मन्त्रिपरिषद् कार्यालयका सचिव गंगाबहादुर खरेलको नेतृत्वमा ७ सदस्यीय समिति गठन गरेको हो । समितिलाई सवारी दुर्घटनाका सम्बन्धमा सत्यतथ्य पत्ता लगाएर १५ दिनभित्र प्रदेश सरकारलाई प्रतिवेदन पेश गर्ने कार्यादेश दिइएको छ ।

दुर्घटनामा सिंह, उनकी पत्नी अमृता, भाउजु जयादेवीको पनि ज्यान गएको थियो । सिंहका अंगरक्षक दीपक भण्डारी र चालक धर्मराज जोशको गम्भीर अवस्थामा नेपालगन्ज मेडिकल कलेज कोहलपुरमा उपचार भइरहेको छ । 

छानबिन समिति सदस्यमा सदस्यमा प्रदेश  प्रहरी कार्यालयका वरिष्ठ उपरीक्षक (एसएसपी),  सशस्त्र प्रहरी बल नेपाल नं. ७ बैद्यनाथ बाहिनीका सशस्त्र प्रहरी वरिष्ठ उपरीक्षक, मुख्यमन्त्री तथा मन्त्रिपरिषद्को कार्यालयका उपसचिव नवराज ओझा, मुख्य न्यायाधिवक्ताको कार्यालयका उपन्यायाधिवक्ता टेकबहादुर थापा, यातायात व्यवस्था कार्यालय धनगढीका  मेकानिकल इन्जिनियर र कानुन मन्त्रालयका शाखा अधिकृत विष्णुदत्त अवस्थी सदस्य छन् ।

दुर्घटनाको कारण अहिलेसम्म खुल्न सकेको छैन । घाइतेहरु बेहोस् अवस्थामा रहेका कारण कारण खुल्न नसकेको हो ।