केशी प्रदेशको अधिशवेशन सुरु, मुख्यमन्त्री कार्कीद्वारा बजेट अध्यादेश पेस

१४ असार, मोरङ । कोशी प्रदेशसभाको तेस्रो अधिवेशन अन्तर्गत पहिलो बैठक सुरु भएको छ । प्रदेश प्रमुख परशुराम खापुङले मुख्यमन्त्री हिक्मतकुमार कार्कीले विश्वासको मत लिने प्रयोजनका लागि आज अधिवेशन बोलाएका हुन् । 

बैठकमा अहिले मुख्यमन्त्री कार्कीले बजेटसम्बन्धी अध्यादेश प्रदेशसभामा पेश गरेका छन् । सो क्रममा उनले बाध्यतामा परी अध्यादेश ल्याएको बताएका छन् । माओवादी केन्द्र, एकीकृत समाजवादी र जसपाले समर्थन फिर्ता लिएपछि कार्कीले प्रदेश सरकारको आगामी आर्थिक वर्ष २०८०/८१ का लागि नीति तथा कार्यक्रम र वार्षिक बजेट अध्यादेशबाट ल्याएका थिए । 

सरकारले ल्याउने अध्यादेशलाई आह्वन भएको अधिवेशनको पहिलो बैठकमा कारणसहित पेस गर्नुपर्ने संवैधानिक व्यवस्था छ । आजकै बैठकमा कार्कीले विश्वासको मत लिने प्रस्ताव पेस गर्ने भएका छन् । एमाले र राप्रपाबाहेक विपक्षी चार दलले भने उनलाई विश्वासको मत नदिने निर्णय गरिसकेका छन् । एक मत रहेको जसपा भने प्रस्तावको पक्ष वा विपक्ष कतै नलागी तटस्थ बस्ने निर्णय गरेको छ ।

कोशीमा सरकार गठन गर्न ४७ मत आवश्यक पर्छ । हाल कार्कीसँग ४६ मत रहेका छन् । विपक्षीसँग पनि जसपाबाहेक सभामुखसहित ४६ मत रहेका छन् । यस्तो अवस्थामा प्रदेशसभाका पहिलो ठूलो दलको हैसियतले एमालेले नै नयाँ सरकार गठनको अवसर प्राप्त गर्ने संभावना रहन्छ । तर जसपा कुनै पक्षमा ढल्केको खण्डमा बहुमतकै सरकार गठन हुनेछ ।