प्रधानमन्त्रीको राजीनामा माग्दै एमालेले अवरुद्ध गरेपछि राष्ट्रियसभाको बैठक भोलीसम्म स्थगित

२१ असार, काठमाडौं । प्रधानमन्त्रीको राजीनामा माग गर्दै नेकपा एमालेले आज पनि  राष्ट्रियसभाको बैठक अवरुद्ध  पारेको छ । प्रधानमन्त्री प्रचण्डले सोमबार सार्वजकि रुपमा दिएको अभिव्यक्तिलाई लिएर नेकपा (एमाले)ले राष्ट्रियसभाको बिहीबारको बैठक पनि अवरुद्ध गरेको छ । दिउँसो १ बजे बैठक सुरु हुनेवित्तिकै एमाले सांसदहरु सिटबाट उठेर विरोध जनाएका थिए ।

हिजो बुधबारको बैठकमा पनि सुरु भएलगत्तै उठेर सांसदहरुले बैठक चल्न दिएका थिएनन् । एक जनामात्रै सदस्य उठेपनि बैठक चल्न नसक्ने संसद संचालन नियमावली रहेको छ । 

सभाका अध्यक्ष गणेशप्रसाद तिमिल्सिनाले बैठक संचालनका लागि बस्न पटकपटक आग्रह गरेपनि नमानेपछि बैठक असार २२ गते बिहान १२ बजे १ मिनेटसम्मका लागि स्थगित गरिएको छ । 

गत सोमबार प्रधानमन्त्री प्रचण्डले नेपालमा पहिलोपटक ट्रक भित्र्याउने भारतीय नागरिक सरदार प्रितम सिंहको जीवनीमा किरणदीप सन्धुले लेखेको पुस्तक विमोचनका क्रममा सिंह आफूलाई प्रधानमन्त्री बनाउन पटकपटक नयाँदिल्ली गएको भन्दै अभिव्यक्ति दिएका थिए । यसपछि एमालेले प्रधानमन्त्रीको राजीनामा माग गर्दै आइरहेको छ । एमालेले बुधबार प्रतिनिधिसभाको बैठक पनि चल्न दिएन । राजीनामा नआएसम्म चल्न नदिने अडान एमालेको छ । 

यसैबीच बिहीबार बसेको सत्ता गठबन्धनको बैठकले एमालेले अनावश्यक रुपमा विषयलाई बंग्याएर राजीनामा माग गरेको र प्रधानमन्त्रीले जवाफ दिएर सदन चलाउन पहल गर्ने र राजीनामा दिनु नपर्ने निर्णय गरेको छ । एमालेले व्यवस्थालाई डिरेल बनाउने खोजेको भन्दै गठबन्धनका सांसदहरु प्रतिवादको तयारीमा लागेका छन् ।

यो पनि पढ्नुहोस