काठमाडौं आइपुगे सीपीसीका पोलिटब्यूरो सदस्य युआन, शीर्ष नेताहरुसँग भेटवार्ता गर्ने

७ साउन, काठमाडौं । चिनियाँ कम्युनिष्ट पार्टी 'सीपीसी' का पोलिटब्युरो सदस्य युआन च्या च्युन काठमाडौं आइपुगेका छन् । तीन दिने नेपाल भ्रमणका क्रममा आइतबार काठमाडौं आइपुगेका हुन् । सीपीसीका उच्च तहका नेता युआन श्रीलंका भ्रमण सकेर उनी आजै काठमाडौं आइपुगेका हुन् ।

युआन सीपीसीका उच्च तहका नेता हुन् । तीन दिन काठमाडौं रहँदा उनले नेपालका शीर्ष नेताहरूसँग भेटवार्ता गर्नेछन् । यद्यपि प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डसँग भने भेटवार्ता हुनेछैन ।

अब युआनले माओवादीका उपाध्यक्ष तथा गृहमन्त्री समेत रहेका उपप्रधानमन्त्री नारायणकाजी श्रेष्ठ र पार्टीका अन्य नेताहरूसँग भेटवार्ता गर्नेछन् । प्रधानमन्त्री प्रचण्ड साउन ११ मा नेपाल फर्किने भएका छन्  ।

सीपीसीका नेता युआनले कांग्रेस सभापति शेरबहादुर देउवा, एमाले अध्यक्ष केपी शर्मा ओली, नेकपा समाजवादी पार्टीका अध्यक्ष माधवकुमार नेपाललगायत विभिन्न पार्टीका नेताहरूसँग भेटवार्ता गर्ने कार्यक्रम रहेको छ । पूर्वप्रधानमन्त्रीहरू ओली र नेपाल मुलुक बाहिर रहे पनि उनीहरू सोमबारसम्म फर्किसक्नेछन् ।

शीर्ष नेताहरूसँग युआनको भेटवार्ताको विषयलाई लिएर नेपालस्थित चिनियाँ दुतावास, परराष्ट्र मन्त्रालय र राजनीतिक दलहरू बीच गृहकार्य गरिरहेको बताइएको छ । आइतबार नेपाल भ्रमणमा आएका युआन सीपीसीका २४ जना केन्द्रीय पोलिटब्युरो सदस्य मध्ये एक सदस्य हुन् । ७ जनाको स्थायी कमिटीपछि दोस्रो तहको शक्तिशाली तहको रुपमा केन्द्रिय पोलिटब्युरोलाई लिइन्छ ।

सीपीसीको सन् २०२२ मा भएको २० औ जनकंग्रेसले उनलाई उक्त जिम्मेवारी दिएको थियो । उनी यसअघि सीपीसीका केन्द्रीय सदस्य मात्र थिए । उनी राष्ट्रपति सी चिनफिङका विश्वासिला पात्र हुन् ।