शेयर खेलाडी राकेश अडुकियाको घरमा राजश्वको छापा, गोदाम हेर्ने तामाङ पनि पक्राउ

१० साउन, काठमाडौं । प्रख्यात शेयर खेलाडी एवं व्यवसायी राकेश अडुकियाको कमलपोखरीस्थित घरमा राजश्व अनुसन्धान विभागले छापा मारेको छ । गत साता त्रिभुवन अन्तर्राष्ट्रिय विमानस्थलबाट बाहिरिएको एक क्विन्टल सुन तस्करी प्रकरणमा शंकाको घेरामा परेका उनको घरमा आज साँझ राजश्वको टोलीले छापा मारेको हो ।

साउन ८ गते नेपालबहसले सर्वप्रथम सय किलो सुन तस्करीमा अन्तर्राष्ट्रिय माफिया गिरोहको संलग्नता, शंकाको घेरामा शेयर खेलाडी राकेश अडुकिया  शीर्षकमा समाचार ब्रेकिङ गरेको थियो ।

अडुकिया पछिल्लो पटक जुन २६ मा त्रिभुवन अन्तर्राष्ट्रिय विमानस्थलबाट भारत गएको देखिएको थियो ।त्यतैबाट हङकङ पुगेका उनी जुलाई ५ मा दुबई हुँदै नेपाल आएको देखिएको हो  । उनी नेपाल आएपछि हङकङबाटै नेपालमा सुन भित्रिएको थियो । त्यसपछि अनुसन्धानको तीर अडुकिया माथि ताकिएको थियो र उनी राजश्वको निगरानीमा परेका थिए ।

चर्चित शेयर खेलाडी समेत रहेका राकेश अडुकियाले बिगत लामो समयदेखि हङकङबाट चाँदीका नाममा सुन भित्र्याउँदै आएको आशंका गरिएको थियो । अनुसन्धानमा तानिन सक्ने भयले उनका छोरा रोहन अडुकिया गत शुक्रबारै दिल्लीतर्फ उडेका थिए भने बाबु राकेश पनि हङकङ जाने तयारीमा थिए ।

आजै विभागले सुन राख्नका लागि उपत्यकामा राखिएका गोदामको व्यवस्थापनका लागि सहयोग गरेको आरोपमा  नरेश भनेर चिनिने सुरेन्द्र तामाङलाई पक्राउ गरेको छ । विभागका एक अधिकारीका अनुसार, तामाङले सुन व्यवस्थापनका लागि गोदाम खोजिदिने काम गरेका थिए ।

उनलाई पक्राउ गरेर विभागले माथिल्लो नेक्ससबारे अनुसन्धान गरिरहेको छ । योसँगै सुन तस्करी प्रकरणमा समातिनेको संख्या १७ पुगेको छ ।

त्रिभुवन अन्तरर्राष्ट्रिय विमानस्थलको भन्सार जाँच पार गरेर २ साउनमा एक क्वीन्टल सुन बाहिरिएको थियो । विशेष सूचनाका आधारमा राजश्व अनुसन्धान विभागको टोलीले बरामद गरेको थियो । हङकङबाट आएको सुन मोटरसाइकल र स्कुटरको ‘ब्रेक शु’भित्र लुकाएर ल्याइएको थियो ।