लघुवित्तपीडितका माग सम्बोधन गर्न राष्ट्र बैंकसहित दुई मन्त्रालयका प्रतिनिधि राखेर वार्ता समिति गठन

११ साउन, काठमाडौं । आन्दोलनरत लघुवित्तपीडितहरुले उठाएका माग सम्बोधन गर्न अर्थ मन्त्रालयले वार्ता समिति गठन गरेको छ । लामो समयदेखि काठमाडौंमा आन्दोलन गर्दै आएका लघुवित्तपीडितसँग वार्ता गर्न समिति गठन गरेको हो । 

अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखाका प्रमुख सहसचिव भुपाल बरालको संयोजकत्वमा वार्ता समिति गठन गरेको मन्त्रालयले जनाएको छ । अर्थमन्त्रीस्तरको निर्णयबाट गठन भएको वार्ता समितिमा गृह मन्त्रालय, कानुन, न्याय तथा संसदीय मामिला मन्त्रालय तथा नेपाल राष्ट्र बैंकका प्रतिनिधि पनि सदस्य रहनेछन् ।

सो समितिलाई लघुवित्त पीडित समितिसँग वार्ता तथा छलफल गरी समाधानको सिफारिस गर्ने कार्यादेश दिइएको छ । नेपाल राष्ट्र बैंकले पनि छुट्टै डेस्क राखेर लघुवित्त पीडितको समस्या समाधानको प्रयास गरिरहेको छ । अहिले पनि काठमाडौंमा आन्दोलन जारी नै भएकाले वार्ता मार्फत् पनि समाधानको पहल गर्न समिति गठन भएको हो ।