दिगो विकास तथा सुशासन समितिद्वारा कार्ययोजना प्रस्ताव तयार

१२ साउन,काठमाडौं । दिगो विकास र तथा सुशासन समितिले,  भ्रष्टाचार निवारण र सुशासन प्रवर्द्धनमा जोड दिँदै २१ बुँदे क्रियाकलापसम्बन्धी प्रस्ताव तयार गरेको छ । समितिको आजको बैठकमा चालु आर्थिक वर्ष २०८०÷८१ को कार्ययोजनामा  भ्रष्टाचार निवारण र सुशासनका सन्दर्भमा नियामक निकायसँग गहन छलफल र अन्तक्रिर्या गरिने बताइएको छ । 

आगामी १६औँ पञ्चवर्षीय योजना, लैङ्गिक उत्तरदायी बजेट र दिगो विकास लक्ष्य साङ्केतीकीरणका  विषयमा अर्थ मन्त्रालय र राष्ट्रिय योजना आयोगसँग छलफल गर्ने कार्यक्रम पनि समितिले प्रस्ताव गरेको छ । समिति सभापति प्रकाश पन्थले, दिगो विकास लक्षित र लैङ्गिक उत्तरदायी योजना निर्माण,  पूर्वाधार विकास, खानेपानी, वातावरणीय सन्तुलन तथा फोहर व्यवस्थापन, सुशासन प्रवद्र्धन र  सेवा प्रवाहका मुद्दालाई समितिले जोड दिएको बताए । 

त्यस्तै समितिमा सदस्य भुवन सुनारको संयोजकत्वमा गठित उपसमितिले तयार गरेको  दलितका सवाल सम्बन्धि सङ्कल्प प्रस्ताव कार्यान्वयन कार्यायोजनाको मस्यौदा प्रतिवेदन पेस गरिएको छ । राष्ट्रिय सभाले मातहतका समितिलाई उक्त प्रस्ताव तयार गर्न गात चैत ८ गतेको बैठकबाट सर्वसम्मतीले निर्देशन दिएको थियो । 

बैठकमा सभापति पन्थले भने ‘विशेष गरेर राष्ट्रिय सभामा दलितहरुको हक हितका बारेमा संकल्प प्रस्ताव केही महिना अगाडि पारित भएको थियो । त्यसको कार्यान्वयनको लागि सरकारलाई निर्देशन दिएको थियो भने उक्त कार्यान्वयनको अनुगमनको लागि समितिहरुलाई निर्देशन थियो । सोहि अनुरुप संकल्प प्रस्ताव कार्ययोजना अनुगमन उपसमिति गठन गरेर त्यसको केही कार्ययोजनाहरु बनाएको थियो।’