एमालेको अवरोधका कारण राष्ट्रियसभा बैठक २२ गतेसम्मका लागि स्थगित

१८ साउन, काठमाडौं । प्रमुख प्रतिपक्षी नेकपा (एमाले)को अवरोधका कारण आज राष्ट्रिय सभा बैठक चल्न सकेन । अध्यक्ष गणेशप्रसाद तिमल्सिनाले बैठक सुरु भएको जानकारी गराउनसँथ एमालेका सांसद देवेन्द्र दाहालले संक्षिप्तमा धारणा राख्दै क्विन्टल सुन तस्करीमा सरकारको मिलेमतो देखिएकाले छानबिनका लागि संसदीय समिति गठन नभएसम्म बैठक चल्न नदिने बताएका थिए । 

सो पछि एमालेका सांसदहरु कुर्सीबाट उठेर बैठक अवरुद्ध पारेका थिए । अध्यक्ष तिमिल्सिनाले विषयबारे सदनको गम्भीर ध्यानाकर्षण भएको र सरकारले आफ्नो जिम्मेवारी पूरा गरिरहेको अवस्थामा बैठक चल्न दिन पटक पटक आग्रह गरेपनि अवरोध हटाउन अस्वीकार गरेपछि बैठक यही साउन २२ गते दिउँसो १ बजेर १ मिनेटमा बस्ने स्थगित गरिएको छ ।

एमालेले यही विषयलाई लिएर संसदको तल्लो सदन प्रतिनिधिसभाको बैठक पनि अवरुद्ध पार्दै आइरहेको छ । प्रतिनिधिसभाको बैठक पनि साउन २२ गते दिउँसो १ बजेका लागि डाकिएको छ ।