प्रधानमन्त्री प्रचण्डसँग अमेरिकी राजदूत थम्पसनले राखे एमसीसी कार्यान्वयनबारे चासो

१८ साउन, काठमाडौं । नेपालका लागि अमेरिकी राजदूत डीन थम्पसनले प्रधानमन्त्री पुष्पकमल दाहाल ‘प्रचण्ड’लाई भेट गरेर मिलेनियम च्यालेन्ज कर्पोरेसन (एमसीसी) कार्यान्वयनबारे चासो राखेका छन् । 

थम्पसनले बिहीबार बिहान प्रधानमन्त्री निवास बालुवाटारमा पुगेर भेटवार्ता गरेका थिए । संसदबाट पारित गरिएको एमसीसी सम्झौता कार्यान्वयनको चरणमा छ ।

थम्पसनले एमसीसी परियोजना सम्झौता कार्यान्वयनले नेपालको आर्थिक विकासमा महत्वपूर्ण सहयोग पुग्ने धारणा राखेका थिए । एमसीसी सम्झौताअनुसार अमेरिकाले नेपाललाई प्रसारण लाइन र ग्रामीण भेगका सडक निर्माणमा पाँच वर्षभित्र ५० करोड अमेरिकी डलर अनुदान दिने घोषणा गरेको छ । त्यसमा नेपालले २५ प्रतिशत लगानी गर्नुपर्ने प्रावधान छ । 

जवाफमा प्रधानमन्त्री प्रचण्डले सम्झौता कार्यान्वयनका गइसकेको र अमेरिकाबाट निरन्तर सहयोग रहने अपेक्षा गरेको बताएका थिए । थम्पसनले संयुक्त राष्ट्रसंघको महासभामा भाग लिन जाने नजानेबारे पनि प्रधानमन्त्रीसँग चासो देखाएका थिए । 

एमसीसी राष्ट्र हितविरुद्ध रहेको भन्दै विभिन्न राजनीतिक दलहरूले भने खारेजीका लागि संघर्ष चलाइरहेका छन् । प्रसारण लाइन बनाउन आवश्यक जग्गा उपलब्ध गराउने काममा अवरोध पुर्याउँदै आइरहेका छन् ।