प्रधानन्यायाधीश सिफारिस गर्न संवैधानिक परिषद्को बैठक सिंहदरबारमा जारी

१८ साउन, काठमाडौं । सिंहदरबारस्थित प्रधानमन्त्री एवं मन्त्रिपरिषदको कार्यालयमा संवैधानिक परिषदको बैठक सुरु भएको छ । नयाँ प्रधानन्यायाधीश सिफारिसबारे छलफल गर्न परिषद्को बैठक सुरु भएको छ । 

बैठकमा प्रधानमन्त्री प्रचण्ड, सभामुख, उपसभामुख, राष्ट्रियसभाका अध्यक्ष, प्रधानन्यायाधीश, प्रमुख प्रतिपक्षी दल एमालेका अध्यक्ष केपी शर्मा ओली सहभागी छन् । बैठकले उमेरहदका कारण आउँदो शनिबार अवकाशमा जान लागेका प्रन्या हरिकृष्ण कार्कीको स्थानमा नयाँ प्रन्या नियुक्तिका नाम सिफारिस गर्ने निर्णय लिने भएको छ । 

यसअघि मंगलबार बसेको बैठकमा मंगलबार बसेको बैठकमा सहमति नजुटेपछि बैठक बिना निष्कर्ष टुंगिएको थियो । ओलीले भने संसदीय समितिका सभापति चयन र प्रन्यामा सिफारिस निर्णय प्याकेजमा हुनुपर्ने तर्क राख्दै आएका छन् । 

प्रधानन्यायाधीशको पदावधि सकिन एक महिनाअघि नै नयाँ प्रधानन्यायाधीश सिफारिस गर्नुपर्ने भएपनि राजनीतिक सहमति कायम नहुँदा निर्णय ढिला  भएको छ । साथै अवकाशमा जानु महिनापहिल्यै बिदामा बस्नुपर्ने परम्परा पनि तोडिएको छ ।

प्रन्याका लागि सर्वोच्चका न्यायाधीश विश्वम्भरप्रसाद श्रेष्ठ रोलक्रममामा अग्रपंक्तिमा छन् ।