तस्करी राेक्न र सुशासनकाे माग गर्दै थापाथली क्याम्पसका विद्यार्थीहरुले प्रदर्शन

१९ साउन, काठमाडौं । सरकार सुशासन कायम गर्न भ्रष्टाचारी तथा तस्कर रोक्न असफल भएको भन्दै थापाथली क्याम्पस स्ववियुको नेतृत्वमा क्याम्पसका विद्यार्थीहरुले सरकारविरुद्ध प्रदर्शन गरेका छन् । 

उनीहरुले सरकारविरोधी नारा लेखिएको प्लेकार्ड र ब्यानरसहित केहीबेर अघि मात्र सडकमा निस्केर प्रदर्शन गरेका छन् । 

त्रिभुवन विश्वविद्यालयकाे आंगिक क्याम्पस थापाथली इन्जिनियरिङ क्यापम्स गेटबाहिर प्रदर्शन गरेका विद्यार्थीहरुले प्रहरीकाे घेरा ताेडेर माइतीघर मण्डलामा पुगेर सरकारविरुद्ध चर्का नाराबाजी गरेका छन् । उनीहरु सरकार गैर जिम्मेवार बनेको, सुशासन दिन नसकेको आरोप लगाए । प्रदर्शनमा सयभन्दा बढी छात्रछात्रा सहभागी भएका छन् । 

तस्करी र भ्रष्टाचार बढेको भन्दै रोक्न माग गरे । उनीहरुले तस्कारी रोक्न नसकेको भन्दै विद्यार्थीले त्रिभुवन विद्यालय रोज्ने कि त्रिभुवन विमानस्थल रोज्ने भन्ने सरकारलाई प्रश्न गरेका छन् । 

सरकारले झुटा आश्वसन देखाउने र जनतालाई निराश बनाउने बाहेक देश र जनताको पक्षमा काम गर्न नसकेको उनीहरुको भनाइ छ । 

यही साउन २ मा त्रिभुवन अन्तर्राष्ट्रिय विमानस्थलबाट सय केजीभन्दा बढी अवैध सुन भित्रिएको घटनाले मुलुक नै तरंगित बनेको छ । भन्सार विभागले १६ जनालाई पक्राउ गरी अनुसन्धान जारी राखेपनि मुख्य दोषी पत्ता लगाउन सकेको छैन । यसबाट सरकारको चर्को आलोचना भइरहेको छ ।