किसान लघुवित्तको खुद नाफामा आकर्षक सुधार

२५ साउन, काठमाडौं। किसान लघुवित्त वित्तीय संस्थाले गत आर्थिक वर्षको अन्त्यसम्ममा १ करोड ३६ लाख ३२ हजार रुपैयाँ खुद नाफा कमाएको छ । यो नाफा अघिल्लो आर्थिक वर्षमा कमाएको ११ लाख २६ हजार रूपैयाँभन्दा १११०.६६ प्रतिशतले धेरै हो । यसको खुद ब्याज आम्दानी २९.०३ प्रतिशतले घटेर २५ करोड ७० लाख रूपैयाँमा आएको छ । यद्यपि, इम्पेयरमेन्ट चार्जमा उल्लेख कमी आएपछि खुद नाफामा आकर्षक सुधार भएको देखिन्छ । 

अघिल्लो वर्ष १२ करोड २० लाख रुपैयाँ रहेको इम्पेयरमेन्ट चार्ज गत असार मसान्तसम्ममा २ करोड ४७ लाख रूपैयाँमा सीमित भएको छ । किसानको रिजर्भ कोष र रिटेन्ड अर्निङ शीर्षकमा भने गिरावट आएको छ । खुद नाफा कढेका कारण प्रतिशेयर आम्दानीमा पनि सुधार भएको छ । प्रति शेयर आम्दानी अघिल्लो वर्ष ०.३२ रुपैयाँ रहेकामा अहिले २.७० रुपैयाँ पुगेको छ । प्रति शेयर नेटवर्थ १२६.४२ रुपैयाँ रहेको छ । किसान लघुवित्त हाल जाल्पा लघुवित्तसँग मर्जर प्रक्रियामा रहेको छ ।