कांग्रेस उपसभापति एवं कानुनमन्त्री धनराज गुरुङ अस्पताल भर्ना

२५ साउन, काठमाडौं ।  नेपाली कांग्रेसका उपसभापति एवं कानुन न्याय तथा संसदीय मामिला मन्त्री धनराज गुरुङ अस्पताल भर्ना भएका छन् । उनलाई महाराजगञ्ज मनमोहन कार्डियोथोरासिक भास्कुलर सेन्टरमा भर्ना गरिएको छ । प्रेसर लो भएको भन्दै असहज महसुस गरेपछि मन्त्री गुरुङलाई महाराजगन्ज स्थित मनमोहन अस्पतालमा भर्ना गरिएको उनको सचिवालयले जनाएको छ । 

मन्त्री गुरुङले अमेरिकाबाट फर्किएदेखि नै शरीर अस्वस्थ भएको र आफू शारीरिक रुपमा कमजोर बन्दै गएको बताउँदै आएका थिए । धेरै दौडधुप भएको र आराम नपुगेको भन्दै उनले असहज रुपमा पनि मन्त्रालयका नियमित काम गर्दै आएका थिए । तर, बिहीबार बिहान धेरै गाह्रो भएको र छातीसमेत दुखेको भनेपछि उनलाई अस्पताल भनाए गरिएको हो ।

अहिले उनको स्वास्थ्य परीक्षण भइरहेकाले गुरुङलाई के भएको भन्ने विषयमा चिकित्सकहरूले केही बताएका छैनन् । उनलाई ब्लड प्रेसर र मुटुको धडकन कम भएकाले अस्पताल भर्ना गरिएको उनका सहयोगी प्रेम केसीले जानकारी दिए । मन्त्री गुरुङलाई आज डाक्टरको निगरानीमा अस्पतालमै राखिने केसीले जानकारी दिए ।