सुन तस्करी प्रकरणमा संलग्न भनिएका व्यापारी राकेश अडुकियाका छोरा रोहन विमानस्थलबाट पक्राउ

२६ साउन, काठमाडौं । करिब १०० किलो सुन तस्करी प्रकरणमा व्यापारी राकेश अकुडियाका छोरा रोहन अडुकिया त्रिभुवन अन्तराष्ट्रिय विमानस्थलबाट पक्राउ परेका छन् । नयाँ दिल्ली हुँदै इन्डियो विमानमार्फत काठमाडौं आएका उनलाई विमानस्थलबाटै पक्राउ गरिएको हो । पक्राउ परेका उनलाई अध्यागमन विभागले राजश्व अनुसन्धान विभागमा बुझाइएको छ ।

यसअघि त्रिभुवन अन्तर्राष्ट्रिय विमानस्थलबाट बाहिरिएको एक क्विन्टल सुन तस्करी प्रकरणको अनुसन्धानका क्रममा राजश्व अनुसन्धान  विभागले व्यापारी अडुकियाको घरमा छापा मारेको  थियो । प्रख्यात शेयर खेलाडीसमेत रहेका व्यवसायी राकेश अडुकियाको कमलपोखरीस्थित घरमा राजश्व अनुसन्धान विभागले छापा मारेको थियो । 

साउन ८ गते नेपालबहसले सर्वप्रथम सय किलो सुन तस्करीमा अन्तर्राष्ट्रिय माफिया गिरोहको संलग्नता, शंकाको घेरामा शेयर खेलाडी राकेश अडुकिया  शीर्षकमा समाचार ब्रेकिङ गरेको थियो । अडुकिया पछिल्लो पटक जुन २६ मा त्रिभुवन अन्तर्राष्ट्रिय विमानस्थलबाट भारत गएको देखिएको थियो । 

त्यतैबाट हङकङ पुगेका उनी जुलाई ५ मा दुबई हुँदै नेपाल आएको देखिएको हो  । उनी नेपाल आएपछि हङकङबाटै नेपालमा सुन भित्रिएको थियो । त्यसपछि अनुसन्धानको तीर अडुकिया माथि ताकिएको थियो र उनी राजश्वको निगरानीमा परेका थिए । छोरो रोहन पनि लामो समय हङकङ बसेर नेपालमा दुई नम्बरीका सामान पठाउने गर्दथे । 

नेपालमा १ किलो सुन समातिएपछि पक्राउन पर्ने डरले उनी भारततर्फ भागेका थिए । इन्डिगो एअरको विमानबाट नयाँ दिल्ली हुँदै नेपाल आइरहेका उनलाई अध्यागमन विभागको नेपाली पोर्टमा ब्ल्याक लिस्टमा रहेको देखिएकोले राहदानीसहित नियन्त्रणमा लिएर विभागमा पठाइएको हो । सुन तस्करी प्रकरणमा नाम जोडिएपछि राकेश भने फरार रहँदै आएका छन् ।

क्विन्टल सुन तस्करी प्रकरणमा मुछिएका व्यापारी अडुकियाले पछिल्ला नौ महिनामा १४ पटक नेपाल–हङकङ ओहोरदोहोर गरेको भेटिएको थियो । सरकारी अभिलेखअनुसार नेपाली नागरिक रहेका उनले भारतीय राहदानीबाट विभिन्न मुलुकको यात्रा गरेका हुन् । उनको यो पटक–पटकको यात्रा सुन तस्करीमै जोडिएको आशंका अनुसन्धानमा संलग्न निकायले गरेका छन् ।

क्विन्टल सुन तस्करी प्रकरणमा संलग्न दुई चिनियाँ नागरिक पनि शुक्रबार त्रिभुवन अन्तर्राष्ट्रिय विमानस्थलबाट पक्राउ परेका थिए । हिमालय एयरलाइन्सबाट चीन भाग्न लागेका ली जियालिन र लिउ फुयानलाई त्रिभुवन विमानस्थल अध्यागमन कार्यालयले शुक्रबार बिहान नियन्त्रणमा लिइ प्रहरीको जिम्मा लगाएको थियो ।