सिरहामा सशस्त्र प्रहरीद्वारा नक्कली प्रहरी पक्राउ

८ भदौ, काठमाडौं । सिरहामा एक जना नक्कली प्रहरीलाई सशस्त्र प्रहरीले पबmाउ गरेको छ । जिल्लाको सीमा क्षेत्रका व्यापारीलाई आफू सई भएको भन्दै रकम असुल्ने लक्ष्मीपुर पतारी–१ का कुमोदकुमार साहलाई शुक्रबार सशस्त्र प्रहरीले पक्राउ गरेको हो ।

उनले नक्कली पेस्तोल देखाउँदै व्यवसायीसँग रकम असुल्ने गर्दै आइरहेको भन्ने सूचनामा आधारमा निगरानीका क्रममा भारतसँग सीमा जोडिएको बडियारपट्टी गाउँपालिका–३ बाट पक्राउ गरिएको सशस्त्र प्रहरीले जनाएको छ । 

भारतबाट नेपालतर्फ आइरहेका लक्ष्मीपुरपतारी–२ का मुकेश यादव र सखुवानन्कारकट्टी गाउँपाालिका–१ का सदन नारायण दासलाई नक्कली पेस्तोल देखाउँदै  ‘नेपाल प्रहरीको सई हुँ’ भन्दै धम्क्याइरहेको अवस्थामा सशस्त्र प्रहरीले नियन्त्रणमा लिएको हो ।

अभियुक्त साहलाई आवश्यक कारवाहीका लागि जिल्ला प्रहरी कार्यालय सिरहाको जिम्मा लगाइएको छ । सीमा क्षेत्रमा सुरक्षा र चेकजाँचका लागि सशस्त्र प्रहरी खटिँदै आएको छ ।