६० किलो सुनको अनुसन्धानमा रहेका थापा सहित ३० जिल्लामा नयाँ प्रहरी प्रमुख फेरिए

१८ भदौ, काठमाडौं । राजश्व अनुसन्धान विभागले बरामद गरेको ६० किलो सुन तस्करी प्रकरणमा अनुसन्धान गरिरहेकासहित गृह मन्त्रालयले ४८ जना प्रहरी उपरीक्षक (एसपी) तथा एक सय २० जना प्रहरी नायव उपरीक्षक (डीएसपी) को सरुवा गरेको छ । सरुवामा ३० जिल्लाका प्रहरी प्रमुख फेरिएका छन् ।

एसपी प्रमुख हुने १२ जिल्ला तथा डीएसपी प्रमुख हुने १८ जिल्लामा नयाँ नेतृत्व पुगेका छन् । जसमा सीआईबाीमा सुन तस्करीको अनुसन्धान गरिरहेका प्रहरी अधिकारीहरूको पनि सरुवा भएको छ । सीआईबीले नयाँ पिलर नै खडा गरेर एसपी सञ्जयसिंह थापाको कमाण्डमा सुन तस्करीको अनुसन्धान गरिरहेको छ । तर उनको सरुवा नुवाकोट भयो । उनी भने यो प्रकरणलाई टुंगोमा पुर्याएपछि मात्रै नुवाकोट जाने भएका छन् ।

एसपी सरुवा अन्तर्गत कास्कीमा अख्तियारबाट मोहन थापालाई पठाइएको छ । त्यस्तै  उदयपुरमा रमेश थापा, सुनसरीमा बीपिन रेग्मी, दाङमा रामबहादुर केसी, बारामा दाङबाट इन्चार्ज टु इन्चार्ज पाउने सुरेश काफ्ले हुन । रौतहटमा महेन्द्रकुमार श्रेष्ठलाई पठाइएको छ । सप्तरीमा गर्जुसिद्धि बज्राचार्य, पूर्वी नवलपरासीमा नरहरि रेग्मी, कपिलवस्तुमा नवरत्न पौडेल, जनसेवा वृत्तबाट बानेश्वर पुगेर रागोलाई गोली हानी चर्चामा आएका वेद विष्टलाई भक्तपुरमा पठाइएको छ । इलाममा वासुदेव खतिवडाको सरुवा भएको छ । अनामनगर वृत्तबाट कर्मचारी प्रशासन हुँदै पश्चिम नवलपरासीमा काजमा गएका एसपी काजीकुमार आचार्यलाई त्यही राखिएको छ । काठमाडौ परिसरबाट मकवानपुर काज खटिएका सीताराम रिजालको त्यहीँ सरुवा भएको छ ।

डीएसपी प्रमुख हुने पहाडी तथा हिमाली जिल्लाका प्रमुख पनि फेरिएका छन् । अर्घाखाँचीमा डीएसपी प्रतितसिंह राठौर, संखुवासभामा घनश्याम श्रेष्ठ, भोजपुरमा सुदीपराज पाठक, खोटाङमा पुरुषोत्तम खड्काको सरुवा भएको छ । कालिकोटमा अर्जुन केसी, प्युठानमा ईश्वर थापा, बाजुरामा कवीन्द्रसिंह बोहरा, पर्वतमा खुमलाल भुसाल, डडेल्धुरामा दीपककुमार कार्की, बैतडीमा दीपक गिरी, सल्यानमा नवीन कार्कीलाई पठाइएको छ ।

मनाङमा फणीन्द्र रानाभाट, मुगुमा वीरेन्द्र थापा, बझाङमा भरतबहादुर शाह, मुस्ताङमा भोजराज पाण्डेय, लमजुङमा मीनबहादुर घलेको सरुवा गरिएको छ । दार्चुलामा शिवबहादुर सिंह, पाँचथरमा हेमन्त भण्डारी क्षेत्रीको सरुवा भएको छ । त्यस्तै, विभिन्न इप्रका तथा प्रहरी वृत्तका प्रमुख पनि फेरिएका छन् ।

यसै गरी प्रहरी प्रधान कार्यालयले गरेको प्रहरी नायव उपरीक्षक (डीएसपी)हरूको सरुवामा उपत्यकाका नौवटा प्रहरी वृत्तका प्रमुख पनि फेरिएका छन् । दरबारमार्ग वृत्तमा डीएसपी गोविन्द थापा तथा लैनचौर वृत्तमा चतुर्भुज ओझालाई खटाइएको छ । थापा प्रहरी महानिरीक्षकको सचिवालय तथा ओझा प्रदेश तालिम केन्द्र, विराटनगरमा कार्यरत थिए ।

यसअघि दरबारमार्गमा कार्यरत डीएसपी कोपिला चुँडालको उपत्यका प्रहरी कार्यालय तथा लैनचौरका गणेणबहादुर बमको प्रहरी प्रधान कार्यालयमा सरुवा भएको छ । त्यस्तै, बौद्ध वृत्तमा राजु पाण्डे, गौशालामा केशव थेबे, पर्वतको कमाण्ड गरेका शिवराज बुढाथोकीलाई नयाँ बानेश्वर, महाराजगन्जमा अम्मरबहादुर थापा क्षेत्री, स्वयम्भूमा पूर्णिमा चन्द, मालीगाउँमा इन्द्रप्रसाद सुवेदी तथा जगातीमा दीप्ति कार्कीलाई सरुवा गरिएको छ ।

महाराजगन्ज वृत्तका अंगुर जिसीको जिल्ला प्रहरी परिसर, काठमाडौं, मालीगाउँका अनिश कर्णको सुरक्षा सेवा व्यवस्थापन महाशाखा, स्वयम्भू वृत्तका राजबाबु महर्जनको जिप्रका धनकुटामा सरुवा भएको छ । बौद्ध वृत्तका हरिबहादुर बस्नेत, गौशाला वृत्तका सञ्जीवबाबु खड्काको प्रहरी प्रधान कार्यालय, नयाँ बानेश्वर वृत्तका निशान्त श्रीवास्तवको ईन्चार्ज टु ईन्चार्ज जिप्रका डोटी, जगातीका राजकुमार श्रेष्ठको जिप्रका काभ्रेमा सरुवा भएको छ ।

०००