बर्दिया कारागारका भाइ-नाइके फरार प्रकरणमा जेलरमाथि कारबाही

७ असोज, काठमाडौं । बर्दिया जिल्ला कारागार (जेल)का ‘भाइ(नाइके’ पर्खाल नाघेर भागेको घटनामा तत्कालीन जेलर सन्तोष विकमाथि विभागीय कारबाही गर्न सिफारिस भएको छ ।

भदौ १७ गते बिहान ३ बजे टोपे भनिने अजिब बुढा क्षेत्री कारागारको पर्खालबाट हाम्फालेर भागेका थिए । प्रहरीले टोली नै बनाएर खोजी गर्दा पनि फेला पार्न सकेको छैन । खोजीका लागि तालिमप्राप्त कुकुरको समेत सहयोग लिइएको थियो । फरार घटनामाथि छानबिन गर्न बनाइएको समितिले जेलर विकलाई कारबाही गर्न सिफारिस गरेको हो । 

कैदी क्षेत्री फरार हुनुमा जेलर विकको भूमिका देखिएको भन्दै कारवाही गर्न समितिबाट सिफारिस भएको प्रमुख जिल्ला अधिकारी नारायण रिसालले बताए । जेलमा हाल विकको स्थानमा काशी पंगेनी जेलर तोकिएका छन् । विकलाई अछाममा सरूवा गरिसकेको छ । कारवाहीबारे गृह मन्त्रालयलाई पत्र पठाइसकिएको छ ।
क्षेत्री फरारका बेला सुरक्षामा खटिएका सुरक्षाकर्मीलाई जिल्लामा तानेर अनुसन्धान जारी राखेको छ । खाेजीमा धेरै दिन जंगलमा परिचालन गरिएकाे २ कुकुर समेत मरिसकेका छन् ।

क्षेत्री २०७२ साल फागुन ५ गते ठाकुरबाबा नगरपालिका–८ का ५९ वर्षीय छिमेकी जोरा सिंह थापाको हत्यामा जिल्ला अदालतबाट दोषी ठहर भई ३० वर्ष कैद सजाय तोकिइ सजाय काटिरहेका बेला फरार भएका हुन् । यसअिघ पनि फरार भएका उनलाई फरारको सजायसहित ३० वर्ष कैद तोकिएको थियो ।

फरार क्षेत्रीकाे खाेजीका लागि प्रहरीले हुलिया समेत इन्टरपाेलमा राखिसकिएकाे जनाइएकाे छ ।

यो पनि पढ्नुहोस