गण्डकी प्रदेशका सबै अस्पतालमा आकस्मिक बाहेकका सबै सेवा बन्द

१० असोज, काठमाडौं । पोखराको मणिपाल अस्पतालमा स्वास्थ्यकर्मीमाथि कुटपिट भएको घटनालाई लिएर आजदेखि अस्पतालमा आकस्मिक बाहेकका सबै सेवा बन्द गरिएको छ ।

चिकित्सकमाथि निरन्तर आक्रमण भइरहेको र सरकारले सुरक्षा दिन नसकेको भन्दै नेपाल चिकित्सक संघ गण्डकीको आह्वानमा अस्पतालले आकस्मिकबाहेक सबैतर्फका सेवा बन्द गरिएको हो । संघले मंगलबार विज्ञप्ति निकालेर बुधबारदेखि प्रदेशभरका सबै अस्पतालमा आकस्मिकबाहेकका सबै सेवा बन्द गर्ने जनाएको थियो ।

आज गण्डकी मात्र भई देशभरका चिकित्सकहरु सुरक्षाको माग गर्दै आन्दोलनमा उत्रिएका छन् । मणिपालमा उपचारका क्रममा लमजुङका एक बिरामीको मृत्यु भएको विषयलाई लिएर सोमबार मृतका आफन्तले चिकित्सकहरुमाथि आक्रमण गरेका थिए । उनीहरु अस्पतालमा तोडफोड समेत गरेका थिए । अस्पतालमा अहिले पनि सुरक्षाकर्मी बाक्लो संख्यामा तैनाथ गरिएको छ । 

आन्दोलनरत चिकित्सकहरुसँग सरकारले मंगलबार मात्रै वार्ता गरे आक्रमणकारीलाई कारवाही गर्ने र गुनासा सुनुवाइ गर्न अस्पतालमा उजुरी बक्स राख्ने लगायन बुँदामा सहमति भएको थियो । तर चिकित्सकहरु आफूहरुको सुरक्षाको गयारेन्टी हुन नसकेको भन्दै अस्पतालहरुमा सेवा बन्द गरेका छन् । आन्दोलनका कारण गण्डकी प्रदेशकै ठूलो अस्पताल पोखरा स्वास्थ्य विज्ञान प्रतिष्ठानमा आज आकस्मिक बाहेकका सेवा बन्द भएको छ । 

ओपीडी लगायत सेवा बन्द हुँदा उपचारका लागि आएका बिरामी समस्यामा परेका छन् ।