कोशीको सभामुखमा राप्रपाका अम्बरबहादुर विष्ट निर्विरोध, रित पुर्याएर घोषणा गर्न बाँकी

२४ पुस, विराटनगर । कोशी प्रदेश सभाको सभामुखमा प्रमुख प्रतिपक्ष दल नेकपा एमालेले उम्मेदवारी नदिने निर्णय गरेसँगै राष्ट्रिय प्रजातन्त्र पार्टी (राप्रपा) का प्रदेश सभा सदस्य अम्बरबहादुर विष्ट सभामुखमा निर्विरोध भएका छन् 

प्रक्रिया पुर्याउन दिउँसो ३ बजेलाई निर्वाचन समय तोकिएको छ । सभामुखका लागि सत्ता गठबन्धनले विष्टलाई अघि सार्ने निर्णय गरेसँगै एमालेले उम्मेदवारी नदिने निर्णय गरेपछि विष्ट सर्वसम्मत भएका हुन् । विष्टलाई नेकपा एमालेले पनि समर्थन गर्ने निर्णय गरेको छ । मंगलबार बिहान बसेको एमाले कोशी प्रदेश संसदीय दलको बैठकले सभामुखमा विष्टलाई समर्थन गर्ने निर्णय गरेको हो ।

नेपाली कांग्रेस, नेकपा माओवादीसहितको सत्ता गठबन्धनले पनि विष्टलाई समर्थन गर्ने बताइसकेका छन् । योसँगै विष्ट कोशी प्रदेशका सभामुखमा निर्विरोध भएका हुन् । मंगलबार बिहान बसेको कार्यव्यवस्था परामर्श समितिको बैठकले दिउँसो ३ बजे सभामुख चयनका लागि निर्वाचन गर्ने निर्णय गरेको भएपनि प्रक्रिया पुर्याएर विष्टलाई सभामुख घोषणा गर्न बाँकी छ ।