श्रमका लागि विदेश जाने युवालाई सरकारले सस्तो ब्याजमा ऋण दिने व्यवस्था गरिँदै

२४ पुस, काठमाडौं । सरकारले श्रमका लागि विदेश जाने युवालाई सस्तो ब्याजदरमा ऋण दिने व्यवस्था गर्ने भएको छ । प्रधानमन्त्री पुष्पकमल दाहाल प्रचण्डले मंगलबार वैदेशिक रोजगारीमा जाने युवाहरू सस्तो ब्याजदरमा सरकारले ऋण दिने व्यवस्था मिलाउन निर्देशन दिएका छन् । उनले मिटरब्याजीहरू र दलालहरूबाट युवाहरू ठगिएको भन्दै सरकारले नै सस्तो ब्याजमा ऋण दिने व्यवस्था मिलाउन निर्देशन दिएका हुन् । श्रम, रोजगार तथा सामाजिक विकास मन्त्रालयसँगको छलफलमा  प्रधानमन्त्रीले सरकारले सस्तो ऋण दिने व्यवस्था मिलाउन भनेका हुन् । 

उनले सामाजिक सुरक्षा कोषमा जम्मा भएको रकमलाई अधिकतम लाभ हुने परियोजनामा लगानी गर्ने व्यवस्था मिलाउन पनि निर्देशन दिएका छन् । श्रमिकलाई उद्यमशील बनाउने र वैदेशिक रोजगारबाट फर्किएको नेपाली दाजुभाइ दिदी बहिनीहरूको ज्ञान सीप र पुँजीको पूर्ण उपयोग हुने क्षेत्रमा लगानी गर्ने वातावरण मिलाउने तर्फ तत्काल परिणाम देखिने गरी कार्य गर्न प्रधानमन्त्रीको निर्देशन छ । 

बैठकमा प्रधानमन्त्रीले वैदेशिक रोजगारीका स–साना कामका लागि पनि काठमाडौं धाउनुपर्ने परिस्थितिको अन्त्य गरी सम्भव सबै सेवाहरू स्थानीय तहबाटै दिने व्यवस्था मिलाउन पनि निर्देशन दिए । ‘वैदेशिक रोजगार सूचना प्रणाली (एफईएमआईएस)लाई अद्यावधिक गरी विदेशस्थित नियोग, रोजगारदाता श्रमिक र ७५३ स्थानीय तहको पहुँच हुने गरी विस्तार गर्नुहोला,’ उनले भने, ‘साथै, पुनः श्रम स्वीकृति दिने कार्य ७५३ स्थानीय तहबाटै दिने व्यवस्था तत्काल मिलाउनुहोला ।’