अध्यागमनले बिहान ८ बजेदेखि बेलुका ८ बजेसम्म सेवा दिने

१ फागुन, काठमाडौं । अध्यागमन विभागले आज फागुन १ गतेदेखि सेवा दिने अवधि बढाएको छ । विभागले आजदेखि बिहान ८ बजेदेखि बेलुका ८ बजेसम्म हप्ताको सातै दिन सेवा दिने भएको छ । 

विभागका निर्देशक रेवती रमण शर्माले जारी गरेको सूचना अनुसार थप गरिएको समयमा नेपाल आगमन पूर्व ई–भिसाको लागि आवेदन र स्वीकृती, पर्यटक भिसा थप, गैह्रपर्यटक भिसाबाट पर्यटक भिसामा रुपान्तरण, गैह्रपर्यटक भिसा जारी र ट्रेकिङ परमिट जारी गर्ने काम हुने छ । ई–भिसाको लागि आवेदन तथा प्राप्ति प्रक्रियाका लागि विभागको वेबसाइटमा अपलोड गरिएको तरिका हेर्न विभागले आग्रह गरेको छ ।  

यसअघि कार्यालय समय बिहान १० बजेदेखि साँझ ५ बजेसम्ममात्र सेवा प्रवाह हुँदै आएको थियो भने सार्वजनिक विदाको दिन विदा हुने गरेको थियो । स्वदेश तथा विदेशमा रहेकाहरुलाई सहज र छिटो सेवा प्रवाह गर्नका लागि समय अवधि थप गरिएको विभागले जनाएको छ । 
ई–भिसामा गइसकेपछि देश–विदेशबाट अप्लाई भइरहेको र युरोप, अमेरिकामा रहेकाहरु उठ्ने बेला नोपलमा सुत्ने बेला हुने भएकाले टाइमिङ नमिल्दा छिटो भिसा नपाउने जस्ता समस्या देखिएपति समय थप गरिएको हो । हप्ताको सातै दिन काम गर्ने गरी व्यवस्था मिलाएको छ ।