जसपाद्वारा महाधिवेशनमा प्रस्तुत हुने दस्ताबेज मस्यौदा समिति गठन, विभागीय जिम्मेवारी बाँडफाँट

१४ फागुन, काठमाडौं । जनता समाजवादी पार्टी 'जसपा' नेपालले महाधिवेशनमा प्रस्तुत हुने दस्तावेजको मस्यौदा तयार गर्न समिति गठन गरेको छ । पार्टीको केन्द्रीय कार्यकारिणी समितिको बैठकले पार्टी अध्यक्ष उपेन्द्र यादवको संयोजकत्वमा २१ सदस्यीय राजनीतिक प्रतिवेदन मस्यौदा समिति गठन गरेको छ ।

 त्यस्तै पार्टीका केन्द्रीय कार्यकारिणी समिति सदस्य एवं सङ्गठन विभाग प्रमुख राजेन्द्र प्रसाद श्रेष्ठको संयोजकत्वमा २३ सदस्यीय पार्टी नीति तथा कार्यक्रम मस्यौदा समिति गठन भएको छ ।

त्यस्तै आसन्न महाधिवेशनको लागि आर्थिक श्रोत व्यवस्थापन गर्न पार्टीका कार्यकारिणी सदस्य विजयकुमार यादवको संयोजकत्वमा ६ सदस्यीय आर्थिक श्रोत व्यवस्थापन समिति गठन भएको छ ।

यसैगरी पार्टी विधान २०८० को धारा ९७ अनुसारको केन्द्रीय विभागहरू र धारा ९९ अनुसारका पार्टी संयन्त्रहरु गठन, पुनर्गठन, अद्यावधिक र सदस्य सङ्ख्या थप गरी जिम्मेवारी बाँडफाँट गरिएको छ । पार्टीले मातहत समितिलाई निर्णय कार्यान्वयन गर्न गराउन आइतबार परिपत्र समेत जारी गरेको  छ ।