सुन तस्करलाई नागरिकता दिलाएको आरोपमा जिप्रका काभ्रेका तत्कालीन अधिकृत अर्याल पक्राउ

२४ फागुन, काठमाडौं । सुन तस्करी प्रकरणमा जिल्ला प्रशासन कार्यालय काभ्रेमा तत्कालीन कार्यरत रामचन्द्र अर्याललाई काभ्रे प्रहरीले नियन्त्रणमा लिएको छ । तिब्बती मूलका बेल्जियन नागरिक दावा छिरिङलाई नागरिकता दिलाएको आरोपमा उनलाई प्रहरीले पक्राउ गरेको हो ।  

उनी हाल वागमती प्रदेशसभा सचिवालय हेटौंडामा छैटौँ तहका अधिकृतका रूपमा कार्यरत छन् । उनलाई हेटौँडाबाटै पक्राउ गरिएको काभ्रेका प्रहरी नायब उपरीक्षक राजकुमार श्रेष्ठले जानकारी दिए । गएको साउनमा ६० किलो सुन तस्करीको आरोपमा पक्राउ परेका दावाले काभ्रेबाट नागरिकता लिएको खुलेपछि प्रहरीले अनुसन्धान थालेको थियो ।

दावाले निमा तामाङका नामबाट ०७४ पुस २० गते नागरिकता लिएका थिए । अधिकृत अर्यालसँगको मिलोमतोमा नागरिकता लिएको खुलेपछि उनी पक्राउ परेका हुन् । दावाले नागरिकता लिँदा सनाखत गर्ने अर्का अधिकृत अझै फरार छन् ।