उपनिर्वाचनका लागि संघमा २० र प्रदेशमा १९ दलको निवेदन

१ चैत, काठमाडौं । निर्वाचन आयोगले आगामी वैशाख १५ गते इलाम र बझाङमा हुने उपनिर्वाचनका लागि संघमा २० र प्रदेशमा १९ दलले निवेदन दिएको जानकारी दिएको छ । निवेदन दिनेहरूमा प्रतिनिधिसभातर्फ २० र प्रदेश सभातर्फ १९ वटा राजनीतिक दल रहेका छन् । 

निर्वाचन आयोगले दल दर्ताका लागि निवेदन दिने समय फागुन ३० गतेसम्म तोकेको थियो ।  उपनिर्वाचनका लागि नेपाली कांग्रेस, नेकपा एमाले, नेकपा माओवादी, राष्ट्रिय स्वतन्त्र पार्टी, राप्रपा, जसपा, नेकपा एस लगायत छन् । 
 
एमाले नेता सुवास नेम्वाङ निधन भएपछि इलाम क्षेत्र नम्बर २ र बझाङ क्षेत्र नम्बर १ (क)मा कांग्रेसका पृथ्वीबहादुर सिंहको सवारी दुर्घटनामा मृत्यु भएपछि रिक्त हुन गएकाले उपनिर्वाचन हुन लागेको हो । रास्वपाले प्रतिनिधिसभामा मात्रै सहभागी हुने निर्णय गरेको छ ।