चैत २७ मा कर्णालीको मुख्यमन्त्री भएका कँडेलले बल्ल नियुक्त गरे एक जना मन्त्री

१२ वैशाख, सुर्खेत । सत्ता समीकरणको विवादका कारण कर्णालीमा १५ दिनसम्म सरकार बन्न सकेको छैन । आज बल्ल कर्णाली प्रदेश सरकारमा माओवादी केन्द्रका रणसिंह परियार विनाविभागीय मन्त्री नियुक्त भएका छन् । अरु मन्त्री कहिले नियुक्त गर्ने भन्ने विषयमा मुख्यमन्त्री नै अन्योलमा छन् । 

चैत्र २७ गते मुख्यमन्त्रीमा नियुक्त भएका कँडेलले गठबन्धनमा विवादका कारण सरकारलाई पूर्णता दिन सकेका छैनन् । मुख्यमन्त्री सहित ८ सदस्यीय मन्त्रिपरिषद् रहेको कर्णालीमा माओवादीले ४ र एमालेले मुख्यमन्त्रीसहित ४ वटा मन्त्रालय लिने सहमति भएको थियो । 

मुख्यमन्त्री यामलाल कँडेलले गठबन्धन घटक माओवादीका सांसद परियारलाई बुधबार दिउँसो विनाविभागीय मन्त्री नियुक्त गरेका हुन् । नवनियुक्त मन्त्री परियारले पद तथा गोपनीयताको शपथ पनि लिइसकेका छन् । उनलाई प्रदेश प्रमुख तिलक परियारले शपथ गराएका हुन् ।

आज बिहान बसेको माओवादी संसदीय दलको बैठकले परियारलाई विनाविभागीय मन्त्रीको रूपमा पठाउने निर्णय गरेको थियो । सोहीअनुसार मुख्यमन्त्री यामलाल कँडेलले उनलाई मन्त्री नियुक्त गरेका हुन् । परियार हुम्ला प्रदेश सभा (क)बाट निर्वाचित सांसद हुन् । मुख्यमन्त्री कँडेलले भोलि, बिहीबार संसद्बाट विश्वासको मत लिने तयारी गरेका छन् ।