नाम राखेर संसदीय छानबिन समिति बनाउने टीओआरमा सहमति नजिक पुग्यो कार्यदल

८ जेठ, काठमाडौं । संसदीय छानबिन समिति बनाउने टीओआरमा सहमति नजिक पुगिएको कार्यदलले जनाएको छ । गृहमन्त्री रवि लामिछानेको नाम उल्लेख गरेर संसदीय छानबिन समिति बनाउने विषय सहमति हुनसक्ने देखिएको छ ।  

सहकारीको बचत अपचलनबारे छानबिन गर्न संसदीय समिति बनाउन गठित कार्यदलको बैठकमा सहमति गरी संसद्को गतिरोध अन्त्य गर्ने सहमति गरिएको हो । कार्यदलका सदस्य समेत रहेका नेकपा एमालेका प्रमुख सचेतक महेश बर्तौलाले सौहार्दपूर्ण वातावरणमा छलफल भएको बताए ।

मंगलबार बिहान कानुन, न्याय तथा संसदीय मामिला मन्त्रालयमा उक्त प्रकरणमा मध्यमार्गी प्रस्ताव खोज्ने विषयमा छलफल गरिएको उनले जानकारी दिए । बैठकमा नेपाली कांग्रेसका प्रतिनिधिले समितिको कार्यादेश नबनाइँदासम्म संसद्को अवरोध कायमै राख्ने जानकारी गराए पनि छलफल सकारात्मक भएको र सहमति नजिक पुगेको उनको भनाइ छ ।

सकारात्मक भयो । हाम्रो टिममा बसेर छलफल गर्नुपर्छ । उहाँहरुले पनि छलफल गर्नुपर्छ, उनले भने, बाहिर आएजस्तो सहमति भइसकेकको छैन । सहमति गरेर हाउसको गतिरोध अन्त्य गर्ने सहमति भएको हो । हामी सहमतिको अन्त्यतिर छौँ, उनले भने । 

कार्यदल बैठकमा राष्ट्रिय स्वतन्त्र पार्टीका प्रतिनिधि शिशिर खनालले आफ्नो सभापति टीओआरमा नाम राख्न सहमत भएको जानकारी गराएका थिए । आजै सहमतिको ड्राफ्ट गर्ने र पत्रकार सम्मेलन गरेर जानकारी गराइने भएको छ । कार्यदलका सदस्यले एकचरण पार्टीमा पनि छलफल गर्ने र अन्तिम निष्कर्षमा पुग्ने बताएका छन् ।