आफ्ना अडानमा कति लचिलो हुने भन्ने कुरा पार्टीमा छलफल गरेर फेरी बस्ने गरी उठ्यो कार्यदल

८ जेठ, काठमाडौं । संसदीय छानबिन समिति बनाउने टीओआरमा सहमति नजिक पुगिएको कार्यदलले जनाएको छ । एक चरण पार्टीमा छलफल गर्ने र फेरी बस्ने गरी विहानको छलफल सकिएको कार्यदलले जनाएको छ । रवि लामिछानेको नाम उल्लेख गरेर संसदीय छानबिन समिति बनाउने विषयमा कांग्रेस अडिक छ । यसमा सहमति हुनसक्ने विषयमा पाटीभित्र छलफल गर्ने र फेरी बस्ने भनिएको छ ।   

कानून, न्याय तथा संसदीय मामिला मन्त्रालयमा बसेको बैठकमा सत्ता पक्ष र प्रतिपक्ष दलका सदस्यहरुका  अडानमा कति लचक हुने भन्नेबारे सबैले पार्टीसँग छलफल गर्नुपर्ने भएकाले बैठकले कुनै निष्कर्ष दिन सकेन । कार्यदलका सदस्यहरुले पनि बैठक सकारात्मक भएको बताएका छन् । कार्यदलमा सदस्य एवम् नेकपा एमालेका प्रमुख सचेतक महेश बर्तौलाले दुवै पक्षबाट आ–आफ्ना धारणा राख्ने, सुन्ने काम भयो र सहमतिको मध्यविन्दु खोजेर अघि बढ्ने सहमति भएको बताए । 

कार्यदलको बैठकमा सहमति गरी संसद्को गतिरोध अन्त्य गर्ने सहमति गरिएको हो । कार्यदलका सदस्य समेत रहेका नेकपा एमालेका प्रमुख सचेतक महेश बर्तौलाले सौहार्दपूर्ण वातावरणमा छलफल भएको बताए । बैठकमा नेपाली कांग्रेसका प्रतिनिधिले समितिको कार्यादेश नबनाइँदासम्म संसद्को अवरोध कायमै राख्ने जानकारी गराए पनि छलफल सकारात्मक भएको र सहमति नजिक पुगेको उनको भनाइ छ ।

सकारात्मक भयो । हाम्रो टिममा बसेर छलफल गर्नुपर्छ । उहाँहरुले पनि छलफल गर्नुपर्छ, उनले भने, बाहिर आएजस्तो सहमति भइसकेकको छैन । सहमति गरेर हाउसको गतिरोध अन्त्य गर्ने सहमति भएको हो । हामी सहमति अन्तयतिर छौँ, उनले भने । 

कार्यदल बैठकमा राष्ट्रिय स्वतन्त्र पार्टीका प्रतिनिधि शिशिर खनालले आफ्नो सभापति टीओआरमा नाम राख्न सहमत भएको जानकारी गराएका थिए । कार्यदलका सदस्यले एकचरण पार्टीमा पनि छलफल गर्ने र अन्तिम निष्कर्षमा पुग्ने बताएका छन् ।