सिटिजन्स क्यापिटलको अध्यक्षमा श्रेष्ठ तथा संचालकमा अधिकारी नियुक्त

१४ असार, काठमाडौं । सिटिजन्स क्यापिटल लि.को अध्यक्षमा राजेन्द्रलाल श्रेष्ठ तथा सञ्चालकमा नारायणराज अधिकारी नियुक्त भएका छन् । सो क्यापिटलको मुख्य कम्पनी सिटिजन्स बैंक इन्टरनेशनल लि.को तर्फबाट मनोनीत भई क्यापिटलको अध्यक्ष रहेका डेपुटी सीईओ पारसकुमार काफ्लेको असामयिक निधन भई रिक्त हुन गएको अध्यक्ष पदमा यही असार १३ गते बसेको १२५ औं संचालक समितिको बैठकले राजेन्द्रलाल श्रेष्ठलाई अध्यक्षमा नियुक्ति गरेको हो ।

साथै, उक्त बैठकले रिक्त रहन आएको संचालक एक पदका लागि मुख्य कम्पनी सिटिजन्स बैंक ईन्टरनेशनल लि.को तर्फबाट मनोनीत भई आएका नारायणराज अधिकारीलाई संचालक पदमा नियुक्ति गरेको छ । उक्त बैठकमा सिटिजन्स बैंक इन्टरनेशनल लि.तर्फबाट अन्य संचालकमा प्रमेशराज कायस्थ, कर्मचारी संचय कोष तर्फबाट सुवास खड्का, स्वतन्त्र संचालकहरु अभिजित मुल, ज्योत्सना बोहोरा पाण्डेका साथै संस्थाका प्रमुख कार्यकारी अधिकृत सविर बादे श्रेष्ठ तथा कम्पनी सचिव रमेश लुईटेलको उपस्थिति रहेको जनाइएको छ ।

नेपाल धितोपत्र बोर्डबाट सामूहिक लगानी कोषको प्रवर्द्धन, धितो पत्र निष्काशन तथा बिक्री प्रबन्धक, लगानी व्यवस्थापन (पोर्टफोलियो म्यानेजमेन्ट), धितोपत्र प्रत्याभूतिकर्ता (अण्डर राइटर), शेयर रजिस्ट्रार तथा डि–म्याट खाता जस्ता लगानीकर्ताहरुसँग प्रत्यक्ष सरोकारका कामहरू गर्न अनुमति प्राप्त भएको सिटिजन्स क्यापिटल लि. सिटिजन्स बैंकको सहायक कम्पनी रहेको र यो कम्पनीमा  कर्मचारी संचय कोष तथा प्रतिष्ठित उद्योगी व्यवसायीहरूको सह–लगानी रहेको छ । काठमाडौं डिल्लीबजार स्थित बाटुले घरमा संस्थाको रजिष्ट्रर कार्यालय रहेको छ ।

काठमाडौं बाहिरका लगानीकर्ताहरुले पूँजी बजारमा प्रत्यक्ष रुपमा सहभागी भई लगानी गर्न समस्या रहेको हालको परिस्थितिमा संस्थाले लगानी व्यवस्थापक (पोर्टफोलियो म्यानेजर) को सेवा सिटिजन्स बैंकका देशभरिका सम्पूर्ण शाखा कार्यालयहरूबाट प्रदान गरी इच्छुक लगानीकर्ताहरुलाई संस्थाको विज्ञ तथा अनुभवी व्यवस्थापन समूहबाट सेवा प्रदान गर्दै आएको छ ।