मदन भण्डारी र गणेशमान नेतृत्व आन्दोलनले पञ्चायत ढल्योः उपमहासचिव ज्ञवाली

१४ असार, भक्तपुर । नेपाल कम्युनिष्ट पार्टी (एमाले)का उपमहासचिव प्रदीप ज्ञवालीले तत्कालीन एमाले महासचिव स्वं मदन भण्डारी र नेपाली कांग्रेसका सर्वमान्य नेता गणेशमान सिंहको नेतृत्वमा भएको २०४६ सालको जनआन्दोलनले पञ्चायत ढलेको स्मरण गरेका छन् ।  

मध्यपुरथिमिमा आज राष्ट्रिय मानव अधिकार तथा सामाजिक न्याय मञ्च नेपाल (मानव अधिकार अलाइन्स) ले स्वं मदन भण्डारीको ७२ औँ जन्मजयन्तीको अवसरमा आयोजना गरेको मानव अधिकार र बहुदलीय जनवाद विषयक अन्तरसंवादमा उनले मदन भण्डारीको देशप्रतिको योगदान असाध्यै फराकिलो रहेको चर्चा गरे । ज्ञवालीले देशमा जबसम्म नागरिकले आर्थिक अधिकार पाउँदैन तबसम्म देशमा आएको प्रजातन्त्र अधुरो रहने धारणा राखे ।   

एमालेका पोलिटव्यूरो सदस्य महेश बस्नेतले देशको सार्वभौम रक्षा र देशको मानव अधिकार रक्षाका सवालमा स्व मदन भण्डारी निकै अगाडि रहेको उल्लेख गर्दै कम्युनिष्ट आन्दोलनलाई जीवित राख्न उहाँको बिचार उपलब्धीमूलक रहेको धारणा व्यक्त गरे ।  एमालेका भक्तपुर जिल्ला कमिटी अध्यक्ष बचन देउजा, अलाइन्सका अध्यक्ष पुरुषोत्तम श्रेष्ठलगायतले देशमा गणतन्त्र र मानव अधिकारको रक्षाका लागि सधै कटिबद्ध हुनुपर्नेमा जोड दिए ।