सीईओ भण्डारीपछि लालीगुराँस सहकारीका अध्यक्ष र कोषाध्यक्ष पनि पक्राउ

१६ असार, काठमाडौं । सहकारीका बचतकर्ताको ६ अर्ब भन्दा बढी रकम अपचलन गरेको आरोपमा ललितपुरको लालीगुराँस सहकारी संस्थाका अध्यक्ष अमरदास श्रेष्ठसहित ४ जना पक्राउ परेका छन् । यसअघि कार्यकारी प्रमुख सुरेन्द्र भण्डारीलाई पक्राउ गरिएको थियो । 

अध्यक्ष अमरदास श्रेष्ठ र कोषाध्यक्ष अमृतकुमार अर्याललाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो । उनीहरूले आकर्षक ब्याज दिने, चाहिएको बेला बचत झिक्न पाइने विश्वास दिलाई बचतकर्ताहरूलाई हानिनोक्सानी पुर्याइ, सञ्चालकहरूलाई लाभ दिएको प्रहरीको भनाइ छ । 

भूमि व्यवस्था सहकारी तथा गरिबी निवारण मन्त्रालयले २९ फागुनमा सहकारीलाई समस्याग्रस्त घोषणा गरेको थियो । यो सहकारीबाट ६ अर्ब भन्दा बढी रकम अपचलन भएको बताइएको छ । बचतकर्ताको उजुरीका आधारमा उनीहरुलाई पक्राउ गरिएको हो ।