एमालेबाट विष्णु पौडेल अर्थमन्त्री पक्का, अरु को-को बन्दैछन् मन्त्री ?

३१ असार, काठमाडौं । प्रधानमन्त्री केपी शर्मा ओलीले पद तथा गोपनीयताको शपथ लिएसँगै कांग्रेस र आफ्नो दलबाट कम्तीमा १० सदस्यीय मन्त्रिपरिषद गठन गर्ने भएका छन् । राष्ट्रपति निवास शीतलनिवासमा बिहान ११ बजे आयोजना हुने विशेष समारोहमा प्रधानमन्त्री ओलीले शपथ लिएसँगै मन्त्रिपरिषद गठन गर्ने तयारीमा लागेका हुन् ।

उनले एमालेबाट विष्णु पौडेललाई अर्थमन्त्रीका लागि तयारी गर्न भनिसकेका छन् । आइतबार साँझ बसेको सचिवालय बैठकले केही नामहरूबारे छलफल गरेको भएपनि पौडेलबाहेक कसैको टुंगो लागेको छैन । 

राष्ट्रपति कार्यालयले शपथ समारोहमा उपस्थित हुन सबै सांसदहरूलाई निमन्त्रणा समेत गरेको छ । सांसदहरूलाई बिहान १०ः३० भित्र राष्ट्रपतिको कार्यालय, शीतल निवास प्रवेश गरिसक्ने गरी संघीय संसदका महासचिवलाई पत्र पठाइएको छ । काँग्रेससहित साना दलहरूको दुई तिहाइको समर्थनमा एमालेका अध्यक्ष केपी ओली आइतबार प्रधानमन्त्री नियुक्त भएका थिए ।

असार २८ गते पुष्पकमल दाहाल प्रचण्डले विश्वासको मत नपाएपछि पदमुक्त भएका थिए । सोही दिन साँझ ओलीले कांग्रेस लगायत दलको समर्थनमा दाबी पेश गरेका थिए । यो सँगै ओली चौथो पटक प्रधानमन्त्री भएका हुन् । कांग्रेस एमालेको सहमति अनुसार एमालेले अर्थ,सञ्चार, भौतिक तथा पूर्वाधार मन्त्रालय पाउने निश्चित जस्तै छ ।

ती मन्त्रालयको लागि अध्यक्ष तथा प्रधानमन्त्री ओलीको निजी निवासमा भएको छलफलमा मन्त्री बन्नेहरूको नामबारे सामान्य छलफल भएको थियो । छलफलमा सहभागी एक नेताका अनुसार उपाध्यक्ष विष्णु पौडेल, उपमहासचिव पृथ्वी सुब्बा गुरुङ, सचिवद्धय योगेश भट्टराई र छविलाल विश्वकर्मा मन्त्री बन्ने लगभग निश्चित भएको बताइए पनि यसलाई सार्वजनिक गरिएको छैन ।

त्यसैगरी नेताहरू कृष्णगोपाल श्रेष्ठ, विद्या भट्टराई, जुलीकुमारी महतो राष्ट्रिय सभाबाट, भगवती न्यौपाने,दामोदर भण्डारी, पदम गिरी, ऋषिकेश पोखरेललाई पनि मन्त्री बनाउने बारेमा छलफल गरिएको थियो । छलफलमा आएका नामबारे ओलीले ११ बजेसम्म फेरबदल गर्ने अनुमान गरिएको छ । यसअघि कांग्रेस एमालेबीच मन्त्रालयको भागबन्डा आइतबार टुंगिएको थियो ।

एमालेको भागमा अर्थ, सञ्चार तथा सूचना प्रविधि, भौतिक पूर्वाधार तथा यातायात, रक्षा, उद्योग, वाणिज्य तथा आपूर्ति, संघीय  मामिला तथा सामान्य प्रशासन र भूमि व्यवस्था, सहकारी तथा गरिबी निवारण मन्त्रालय परेका छन् ।

त्यसैगरी गृह, परराष्ट्र, संस्कृति पर्यटन तथा नागरिक उड्डयन, शहरी विकास, कृषि तथा पशुपन्छी विकास मन्त्रालय, वन तथा वातावरण, स्वास्थ्य तथा जनसंख्या, ऊर्जा, जलस्रोत तथा सिँचाइ, कानुन, न्याय तथा संसदीय मामिला मन्त्रालय कांग्रेसको भागमा परेको छन् ।