निःशुल्क औषधीमा स्वास्थ्य केन्द्रका कर्मचारीको मनपरी

३ साउन बर्दिया । बर्दियाको मधुवन नगरपालिका ९ स्थित आधारभूत स्वास्थ्य सेवा केन्द्रमा उपचार गर्न आउने विरामीलाई दिनुपर्ने औषधि नदिएको आरोप लागेको छ ।

जिल्लाको मधुवन नगरपालिका वार्ड न ९ धर्मवस्तीमा रहेको आधारभूत स्वास्थ्य सेवा केन्द्रमा सेवा लिन आएका विरामीलाई कार्यालयमा निःशुल्क दिइने औषधी भएपनि कृतिम अभावको सृजना गर्दै औषधी नदिएको पीडितले बताएका छन । 

केही दिन पहिले आफ्नो बच्चालाई लिएर आधारभूत स्वास्थ्य सेवा केन्द्रमा गएकी सीता खनालले आफुहरु बिहानै देखि कुराएर ३ बजेपछि औषधी नभएको भन्दै कर्मचारीले बाहिरबाट किनेर लैजानु भनेको बताए । बच्चालाई सामान्य ज्वरो आएको थियो बिहान १० बजे नै स्वास्थ्य केन्द्रमा गएकी थिए ।

कर्मचारीले केही वेर पर्खनुहोस् औषधी लिएर जानु होला भनेर ३ बजेर ३० मिनेट सम्म कुराएर औषधी नभएको भन्दै फर्काइदिएको खनालले बताए । यस विषयमा बुझ्न खोज्दा आधारभूत स्वास्थ्य सेवा केन्द्रका इन्चार्ज ज्ञानेन्द्र पाण्डेले आफू कार्यालयमा नभएको बेला त्यस्तो भएको हुन सक्ने तर औषधिको अभाव भने नभएको बताए ।