संविधान संशोधनको बहस सुरु भएपछि हिन्दूवादीहरू सक्रिय

५ साउन, काठमाडौं । राष्ट्रिय एकता अभियान काठमाडौंले आज संघीय हिन्दू गणतन्त्र विषयक छलफल कार्यक्रम सम्पन्न गरेको छ। कार्यक्रममा अभियानका केन्द्रीय अध्यक्ष विनय यादवले संविधान संशोधन नेताहरूको कुर्सी स्वार्थको लागि नभई संविधान निर्माणको बेला जनताले दिएको सुझाव अनुसार संशोधन हुनुपर्ने बताएका छन्। 

विशेष गरी संविधान निर्माणको क्रममा जनताले संघीय हिन्दू गणतन्त्रको लागि दिएको दावी गर्दै सो कुरालाई अब संविधानमा समावेश गर्नुपर्नेमा उनले जोड दिए। यदि दलहरूले संविधान संशोधन गर्ने हो भने राष्ट्रिय एकता अभियानले देशभर जन जागरण अभियान चलाएर संघीय हिन्दू गणतन्त्र स्थापनाको लागि दबाब सृजना गर्ने योजना बनाएको यादवले बताए। 

कार्यक्रममा अभियानका वरिष्ठ नेता वीपी यादवले सत्ता स्वार्थको लागि दुई विरोधी दल एक ठाउँमा आएको भन्दै संविधान संशोधनमा समावेशीताको सिद्धान्तलाई अझ बलियो नगरे देशमा एकल जातीय व्यवस्था हाबी हुने र त्यसबाट हिन्दुत्वलाई नोक्सानी हुने बताए। उनले राष्ट्रिय एकता अभियानले उठाएका मुद्दाहरू सशक्त हुँदै गएको र आन्दोलनलाई निष्कर्षसम्म पुर्याउन सशक्त बनाउनुपर्ने बताए।

युवा विभागका संयोजक दिवस पटेलले सञ्चालन गरेको कार्यक्रममा केन्द्रीय सदस्य चन्द्र यदुवंशी, विद्यार्थी परिषदका महासचिव पप्पु यादव, काठमाडौं सम्पर्क समितिका संयोजक विनोद सिंह लगायतले पनि आ–आफ्नो विचार राखेका थिए । कार्यक्रममा दलित अभियन्ता राम कुमार पासवानको नेतृत्वमा १० जना राष्ट्रिय एकता अभियानमा विधिवत् रूपमा प्रवेश गरेका छन्।