कांग्रेसले बहादुरसिंह लामालाई बागमतीको मुख्यमन्त्रीमा अघि सार्ने

६ साउन, काठमाडौं । नेपाली कांग्रेसले बागमती प्रदेशको मुख्यमन्त्रीमा बहादुरसिंह लामालाई अघि सार्ने भएको छ ।  आइतबार बसेको प्रदेश संसदीय दलको बैठकले मुख्यमन्त्रीका लागि बहादुरसिंह लामालाई अघि सार्ने सर्वसम्मत निर्णय गरेको छ । बिहान हेटौंडामा बसेको दलको बैठकले लामालाई मुख्यमन्त्रीको उम्मेदवार बनाउने निर्णय गरेको हो । 

लामालाई मुख्यमन्त्रीको उम्मेदवार बनाउने निर्णय भएको प्रदेश सांसद रमेश महतले नेपालबहसलाई बताए । बागमती प्रदेश सभामा कांग्रेसका ३७ सांसद छन् । लामा बागमती प्रदेश सभामा कांग्रेस संसदीय दलका नेता हुन् । केन्द्रले भने कुनै निर्णय गरेको छैन । प्रदेश सभापति रहेका सांसद इन्द्र बनियाँले पनि मुख्यमन्त्रीमा इच्छा देखाएका थिए । 

मुख्यमन्त्री शालिकराम जम्कट्टेलले आज विश्वासको मत लिँदैछन् । उनले पक्षमा बहुमत नपुग्ने निश्चित छ । जम्मकट्टेलले नेतृत्वको सरकारले विश्वासको मत नपाएपछि कांग्रेसका लामाले एमाले समेतको समर्थनमा आज नै मुख्यमन्त्रीको दाबी पेस गर्ने तयारी गरेका छन् । 

 वाग्मतीमा कांग्रेस र एमालेको सहज बहुमत पुग्ने अवस्था रहेको छ । ११० सदस्यीय प्रदेशसभामा कांग्रेसको ३७ र एमालेको २७ सांसद रहेका छन् । बहुमतका लागि ५६ मतको आवश्यकता रहेको छ ।