बागमतीका जम्कट्टेल र लुम्बिनीका महराले मुख्यमन्त्रीबाट दिए राजीनामा

६ साउन, काठमाडौं । बागमती प्रदेश र लुम्बिनी प्रदेशका मुख्यमन्त्रीले राजीनामा दिएका छन् । आइतबार बागमतीका मुख्यमन्त्री शालिकराम जम्कट्टेल र लुम्बिनीका मुख्यमन्त्री जोखबहादुर महराले पदबाट राजीनामा दिएका हुन् । दुबै मुख्यमन्त्रीले प्रदेश सभा बैठकलाई सम्बोधन गर्दै राजीनामा दिएका हुन् ।

लुम्बिनी प्रदेश सभाका १० दल र एक स्वतन्त्र मध्ये ८ दल र ४८ सदस्यको समर्थनमा चैत २३ गते महरा मुख्यमन्त्री बनेका थिए । नयाँ समीकरण अनुसार सरकार बनाउन एमालेले महरालाई दिएको समर्थन फिर्ता लिएपछि असार २० गतेदेखि उनी अल्पमतमा परेका थिए ।

एमालेले समर्थन फिर्ता लिएपछि उनको अहिले उनको समर्थनमा माओवादीका १०, नेकपा एकिकृत समाजवादीका १ र जनमोर्चाको एक गरी १२ जनाको मात्र समर्थन रहेको छ । स्पष्ट अल्पमतमा परेपछि उनले प्रदेश सभाको बैठकलाई सम्बोधन गर्दै राजीनामा दिएका हुन् ।

यस्तै आइतबार बसेको प्रदेश सभा बैठकलाई सम्बोधन गरेर जम्कट्टेलले राजीनामा दिएका हुन् । विश्वासको मत लिन प्रयोजनका लागि प्रदेश सभा सचिवालयमा प्रस्ताव दर्ता गराएका थिए । तर, माओवादी केन्द्र बागमती प्रदेश संसदीय दलको बैठकले उनलाई राजीनामा सुझाव दिएको थियो ।

लुम्बिनीका मुख्यमन्त्री महराले राजीनामा दिएपछि आइतवार नै एमाले संसदीय दलका नेता लीला गिरीको नेतृत्वमा एमाले कांग्रेस मिलेर सरकार निर्माण गर्ने गरी दुई दलले तयारी गरेका छन् । एमालेका प्रमुख सचेतक तुलसीप्रसाद चौधरीले दुई दल मिलेर एमालेको नेतृत्वमा सरकार गठन गर्ने सहमति भएको बताए । बागमतीमा कांग्रेसले बहादुरसिंह लामालाई मुख्यमन्त्रीमा अघि सार्ने भएको छ ।