निर्वाचन आयुक्तमा कृष्णमान प्रधान संसदीय सुनवाइ समितिबाट अस्वीकृत

१४ साउन, काठमाडौं । संसदीय सुनुवाइ समितिले निर्वाचन आयोगको आयुक्तमा प्रस्तावित कृष्णमान प्रधानलाई अस्वीकृत गरेको छ । संसद भवन नयाँ बानेश्वरमा सोमबार बसेको सुनुवाइ समितिले प्रधानको नाम अस्वीकृत गर्ने निर्णय गरेको हो ।  प्रधान स्वयंले आफू सो पदका लागि इच्छुक नरहेको भन्दै निवेदन दिएका थिए ।
 
प्रस्तावित व्यक्तिले नै निर्वाचन आयुक्तको पदमा नियुक्तिको लागि आफ्नो उम्मेदवारी कायम राख्न नचाहेकाले अस्वीकृत गर्ने निर्णय गरेको समिति सभापति पशुपति शम्शेर जबराले जानकारी दिए । यसअघि समितिमा प्रधानबिरुद्ध निर्वाचन आयुक्त हुने उच्च नैतिक चरित्र नदेखिएको भन्दै उजुरी परेको थियो ।