साउनसम्ममा ५ खर्ब २० अर्ब बराबरको एफडीआई

३ भदौ, काठमाडौं । चालु आर्थिक वर्ष २०८१/८२ को पहिलो एक महिनामा ८ अर्ब ५५ करोड ५० लाख रुपैयाँ बराबर प्रत्यक्ष वैदेशिक लगानी (एफडीआई) स्वीकृत भएको छ । उद्योग विभागका अनुसार यो महिना  ५ अर्ब ९७ करोड रुपैयाँ बराबर एफडीआई स्वीकृत भएको छ । यस महिना कुल ५९ उद्योग दर्ता भएको देखिएको छ ।

अघिल्लो आर्थिक वर्ष २०८०/८१ मा एफडीआई प्रतिबद्धता झन्डै दोब्बरले वृद्धि भएको थियो । उद्योग विभागका अनुसार एक वर्ष अवधिमा ६१ अर्ब ९० करोड ४५ लाख रुपैयाँ बराबर एफडीआई प्रतिबद्धता आएको थियो । अघिल्लो आव २०७९÷८० मा प्रत्यक्ष वैदेशिक लगानी प्रतिबद्धता ३८ अर्ब ४० करोड रुपैयाँ बराबर थियो ।

साउनसम्मको तथ्यांक अनुसार ५ खर्ब २० अर्ब रुपैयाँ बराबर एफडीआई नेपाल भित्रिएको छ । साउनमा दर्ता भएका विदेशी लगानीका उद्योगमध्ये ५७ साना उद्योग छन् । यसरी आएको लगानी प्रतिबद्धतामध्ये ठूलो अंश पर्यटनमा छ । पर्यटनमा कुल ४० उद्योग दर्ता भएको छ । 

सेवा क्षेत्र १२, उत्पादन ३, सूचना–प्रविधि २ र कृषिमा २ उद्योग दर्ता भएको देखिएको छ । साउनमा ४९ करोड ९४ लाख रुपैयाँ बराबर रोयल्टी विदेशी लगानीकर्ताले लगेको देखिएको छ ।